Read Wancho Naga Münchuak-Tsai 34 Bible Online

Münchuak-Tsai 34 - Wancho Naga bible

Münchuak-Tsai 34

¹Kue othuithuima JOWANPA ang münchong faüi; kue chix achuakkya tam-münzaküi.

²Chixe chem mokdaolaxpuix ija hanpakma kue chix achuaküi; afangle thomkya pangnusae ija atat üntoxle mongmüile naxchang!

³Ku füi tomle JOWANPA zaxzangkya apuk-apuahax; keme onotomle chix mün achuak-hax!

⁴Kue JOWANPAto zangjop üntoxle chixe ku zangjop to lan; chazale ngokya pangnu chak tokya chixe ku khangkho zang angai.

⁵Afangle thomkyabue chix to hu üntoxle mongmüi; hwom ang otuechu mong münatho.

⁶Fong angkya mix chitüikya khünakbue chix nyak, ikoxle chix tsa; thangnak pangnu chak tokya chixe hwom khosün.

⁷JOWANPA chathua zale tüikyabu chix kaxtaimixbue nyele thomle, thomzün maklax angkya chak tokya hwom sünle thomle.

⁸JOWANPA chemtukux müipuix ija nang hanpak ang lomle ataklax. Chix ma chalomlule ngo ang atakkyabu a mongmüi mixbu changle.

⁹JOWANPA chathua zakya tüikox, chix khünaknu pangnu; chix kax ma laxle tüikyabu ang hwome lomkya pangwüi tüi ang tomüi.

¹⁰Osüt chitüikoxle mailangpa ngaxchu woknuak ma ngole, ikoxlechu JOWANPA kax ma laxle tüikya müikya oli chemmachu müntüi.

¹¹Oman, ku zuikhui tsünzün-hom, ku kax apalax; kue hünzom hama JOWANPA chathua za angkya apuale fafang.

¹²Nange tsün mongmüi füi ngose tsucha? Nange tsünlwot hia mongmüi laxse tsucha?

¹³Ile jangtexba ochax zangwünkya taxtüi üntoxle kaxthai zangwünkya taxtüi.

¹⁴Ochax hato tok aholaxle müikya mwot moklax; nang mongtsang makhange zongbakle tumüi-mongsom hanpakma azong-afale changkox.

¹⁵Otsao khünakbu to JOWANPAe nyele thomle ilaxle hwom sopkya chixe atatle;

¹⁶Ikoxlechu ochax mwot mokkyabu chixe abaxle, ikhoma chemtue hwom zipuix, hwom a lebama wüi alakle asamle.

¹⁷Otsao khünakbue JOWANPA nyakpongma chixe atatle; hwom tingtui pangnu chak tokya chixe hwom khangkhosünle.

¹⁸JOWANPA a mong atholaxle ngokyabu hama soxle tüile; mongtex asamlaxle ngokyabu pangnu chixe sünle kople.

¹⁹Müikya khünakbu a tingtui malom-malom ma sikngün apongle, ikoxlechu ibu pangnu chak tokya JOWANPAe sünle kople;

²⁰JOWANPAe ibu komkaile sünle thom; hwom za tuitachu pak ang müntom.

²¹Chichangchizangkyabu a ochax chak to maxüi; otsao thua anukyabu ang sikngün fa angkya changle.

²²JOWANPAe chix khünaknu khosünle kopüi; ziakop-hüile chix hato nguikyabu pangwüi kho chixe awaüi.