Read Wancho Naga Münchuak-Tsai 40 Bible Online

Münchuak-Tsai 40 - Wancho Naga bible

Münchuak-Tsai 40

¹JOWANPA ofong-otsox hanpakma kue adule tan; ifüima chixe ku zing apa üntoxle ku sopkya zing atat.

²Za-adünkya tswomkha tokya chixe ku syetle alai, khünak mik amütfang sak khatokya a. Chixe ku longnu tok ma danle azün üntoxle ku ziakople thom.

³Chixe ku hama tsaizün ngao angkya ano, kem Zang ang münchong fakya tsai a. Ija ngün ang kopkya khünakbue khünzai ang kopüi ilaxle hwom mongong JOWANPA ma thomüi.

⁴Opange chapa shwom ang chipaopuix chichangba othai baozangbu to shwomkya othom khato chiwom puix ikoxle JOWANPA to mongong thomle changpuix, mongmüi mixbu a ibu changle.

⁵Nange kwom hanpakma tüle-tüle tsuakle hüidaoa, O JOWANPA, kwom Zang; nang lailaikya owachu müntüi! Nange kwom hanpakma ohünotün mwotthobu tüle-tüle zingdaoa. Kue ibu pangwüi bama akax ang thofang münchang: ibu a okiak chithole changle!

⁶Nange tö hia dan koxkyabu laxse chitsu; nange müi otom ma lanle tö-tsap dingma zokle ashunkya jukya chichang chichangba ochax koplax pao angkya tö koxkya lomkya chichang. Itülüi, nang zing atat angkya hanpakma nange ku ang na koxpu,

⁷ikhoma kue lantsuakpu: “Ku ikhama tüile; nange ku ang adangle fakyabu a Wanlom laipex ma tüile.

⁸Ku Zang, kue nang mongtex mok ang chemtukux mongkünpuix! Nang hwon-nwot kue ku mongkha ma thomle.”

⁹JOWANPA, nang khünaknu tusox ma, nange kwom khosünle kopkya kaxho amüikya kue wünpu. Kue ija mo wünkya münzaktoxüi, ija nang awan ngopu.

¹⁰Khosünkya kaxho omüi kue ku mongkha tata ma chithom; chialekya nang mongong hia ofong-otsox bama kue jento akax ngopu. Nang khünaknu tusox ma ku otuechu nang kax ma laxle hia chizakkya mongkün mowün ang ku dangle chingo.

¹¹JOWANPA, kue awanpu nange ku to chingchakya tam zak angkya münchang. Nang mongkün hia akhüixkyae ku jento sünle thomüi.

¹²Ku a thangnak tuitai huanue akhoplaxle tüile: okiak jaojao chithole! Ku ochaxe ku kopdaoa, ilaxle athaxpi kue ngün ang müntho; ibu a ku khangmun füi ngaxchu sütsexle tüile, ilaxle kue ku mongchen amütdaoa.

¹³JOWANPA, ku khosün hüi! Ku to athax fonghüi!

¹⁴Opange ku lang ang tungle ngopuix hwom to komkaile anao üntoxle kho asamkox. Ku sikngün khoma mongmüi atungle ngokyabu füichi to chat üntoxle zakkop ang tomkox.

¹⁵Opange ku chanyile wanjai laxpuix ibu a hwom to anaokya thoto chabüt-lasünle chang ang tomkox.

¹⁶Nang hato hüikya pangnusa mongmüi atungle pwonla dong ang tomkox. Nang khosün hanpakma münchong fale ngokyabu pangnue othuithuima: “JOWANPA, nang a chemtukux chongpuix!”, le thüi ang tomkox.

¹⁷O Jowanpa, ku a muakya mix tamchu zasa changle, ikoxlechu nang ku otuechu chialak. Nang a ku khosünpa tamchu Zang changpu: ku to fong ang momlax!