Read Wancho Naga Münchuak-Tsai 44 Bible Online

Münchuak-Tsai 44 - Wancho Naga bible

Münchuak-Tsai 44

¹Kwom na makhange jao kwome ija atatdaoa, O Zang: kwom pupa hwome ija bama kwom hama wünpu, hwom tsün ma nange mokkya ohünotünbu bama a, kaile pupa hwom tsün to a;

²nang tatae chemle songsari khünakbu jwonle apaopuix üntoxle chemle hwom haxtok ma nang khünaknu ating-anok ang tompuix; nange jat-libu mamabu to chemle sikngün ang tompuix üntoxle nang mamixbu a ahak-aluale chang ang tompuix, ibu pangwüi a.

³Nang khünakbue ija haxtok to hwom chang hwom paxbu füi lütkya chichangpu; hwome ija hwom tsak hwom zong füi lütkya chichangpu; nangtsak-nangzong füitix lütle tsuakpu, nang womle tüikya mongchen füitix tsuakpu, ijaetix hwom tokya nang mongkün ahopu.

⁴Nang a ku chongwangpa tamchu Zang changle; nange nang khünaknu ang tholünkya koxle,

⁵ilaxle nang tsak-zong füi kwome zanbu to lütle.

⁶Kue ku khosün hanpakma ku hapnu to mong chiong chichangba ku changlo to chiong;

⁷ikoxlechu zanpabu chak tokya nange kwom khosünle koppu ilaxle kwom to miktsakle ngokyabu to anaopu.

⁸Kwome jento nang achuakachenle changüi ilaxle othuithuima nang ang münchong faüi. Selah

⁹Ikoxle athax a nange kwom chilaxle awüt üntoxle mixe lüt ang tompu; athaxpi nang a kwom süpahibu füi tomle zan to chikapu.

¹⁰Nange kwom zanthoto zikle pao ang tompu, ilaxle kwom kux chem tüikya hex hwome kople paopu.

¹¹Nange kwom chun langkya ningle lang ang tompu; nange kwom mix chaxwanbu to chiakle asampu.

¹²Hwom a chem thakhochu chinguikya ningle nange nang khünaknu thanai ma hangle awütpu.

¹³Nange kwom to chem hwonpuix kwom tomzibue ngünle laxpu, ilaxle hwome kwom chanyile wanjaipu.

¹⁴Nange kwom a jat-libu khato chanyit otong ang achangpu; kwom ajaole hwome ngom sakpu.

¹⁵Ku to miktsakkya zanpabue ku adakya hia ajaokya atatlaxle

¹⁶ku a othuithuima künmax-mongshanle ngopu; ku a thünzake chwoplaxle ngopu.

¹⁷Kwome nang alakle chichang koxlechu chichangba nange kwom füi zingkya Tsaotsüt chiamale tüikoxchu Ibu pangnu kwome apongle hüipu.

¹⁸Kwom nang zongto otuechu mongong chithomkya mix ang chichangtox; kwome nang kaxtombu kax ma chilaxle chitüitox.

¹⁹Ikoxlechu nange kwom faomüibu khato fongle fa angkya mix owa chitüile dantoxpu; nange kwom zangnaknu othongdua to danle toxpu.

²⁰Kwome kwom Zang to shwomkya zakle jangchangdao üntoxle mixnok zang to jop-tole jangchangdao thüiningle

²¹nange ija chithaile atakdaose, chemthüikoxle nange kwom huxsa mongjangbu awanle.

²²Ikoxle tütatuehex chithüile kwom lang-huakle ngokya a nang khokho ma changle, ikhoma kwom to lang ang kopkya chun tuita to hwonkya ningle hwonle.

²³Zohüi, Jowanpa! Nang büthüikoxle jiple ngopu? Nang ajonglax üntoxle kwom a othuithuima awütle taxthom!

²⁴Kwom thoto nang büthüikoxle khünle ngopu? Kwom sikngün hia tuita taxalak!

²⁵Kwom a hax to zutle akhixdaoa; mixe anaolaxle kwom a haxbu khato anguakdaoa.

²⁶Kwom to asun ang nguihüi! Tamchu chithwonkya nang mongküne kwom khosün hüi!