Read Wancho Naga Münchuak-Tsai 49 Bible Online

Münchuak-Tsai 49 - Wancho Naga bible

Münchuak-Tsai 49

¹Pangnusae wüi, ija atatle koplax! Apahüi, khünaknu pangnusae,

²chongkya hixkya noknusae, hakpa-luapa hia chitüi-chinang pangnusae.

³Ku tutex a tsaothale tüiüi; kue je-hwon kaxbu akaxle changüi.

⁴Kue wanwünkaxbu chito mongkoxüi, waxmai müt-ngale kue ija chem hanpakhex apuale faüi.

⁵Fünma asaole changpongma ku ojao münza ku to zanpabue akhople kop pongma,

⁶ochax khünakbue hwom ma tüinangkya to mongongle ilaxle hwom tuina bama tsaichong-kaxbongle.

⁷Keme malailai to otuechu ma khüzün tsangthom ang müntsuak; Zang ang keme kem khüzün thathom ang müntsuak,

⁸khünak khüzün otha a namhuanu changle. Keme chem koxpuix ija chemtuechu mün-nguitoxüi

⁹zuk-kha tokya kem kople thom ang, othuithuima kem ozün ma thom ang a.

¹⁰Jepa hwom ngaxchu zile paokya noke ngünle hüipu, ilailaile ongat-onguibu chuwüi zipu. Hwom pangnuewüi matui-manabu su-sa hwom chak to danle toxpu.

¹¹Hwom zuk-khabu a othuithuima hwom hom ang achangpu; ikhato hwom jento ngopu; tam a hwom ang ma haxtokbu tüihukya.

¹²Kem bong-chongkyae kem zik chak tokya kople thom ang chitho; kemchu müibu ningle zile pao angkya wüi changle.

¹³Ma to alüile onglax ngokyabu chemle changpuix hulax, opang osho tuina füi mongtexshale tüikya hex:

¹⁴hwom a chunbu lailaile zimax angkya laipu, ilaxle zik tix hwom chunnyetpa changpu. Selah otsao khünakbue hwom to anaoüi, hwom tsangtsa chwonle shanle paopongma mahax mahombu füi atsaile ochu amalumting to.

¹⁵Ikoxlechu Zang-e ku khose kopüi; zikmüt-mangkho tsak-zong chak tokya chixe ku azünüi. Selah

¹⁶Owawa ahak-aluakya to mong taxma, chixtui chixna sisile zaxle changkoxchu a;

¹⁷chix zikya zuma chix füi tomle ibu laxlaxtoxüi münchang; chixtui chixna chix füi tomle zuk-khato paoüi münchang.

¹⁸Owawa ma tsün füi mongzom-müile tüikoxchu üntoxle jali tho-lünle changkya khoma chix ahuak-achenle tüikoxchu,

¹⁹chix chuwüi zikya zuma hopu-hopa hwom ha alopdaoüi, ikhato jento zangnak fangto ngoüi.

²⁰Kem chong-bongkyae kem zik chak tokya azüntsuaküi le münchang; kem chuwüi müibu lailaile zile pao angkya changle.