Read Wancho Naga Münchuak-Tsai 5 Bible Online

Münchuak-Tsai 5 - Wancho Naga bible

Münchuak-Tsai 5

¹Ku kax apahüi, O JOWANPA, üntoxle ku sopkya to apahüi.

²Fonghüile akhong pongma ku to apahüi, ku Zang üntoxle ku wanghompa! Kue nang to zangjoppu, O JOWANPA;

³nange anopningle ku kaxzing apahüi; zanghan chüdüne kue zangjoppu üntoxle nang kaxlan to hule nuipu.

⁴Nang a thaile mokkya füi mongmüikya Zang münchang; nang tüingale haxshix ngo ang tomüi münchang.

⁵Otuechu nang ongam chikaoma sele münajongtox; chichang-chizang khünakbu thua chianule müntox.

⁶Atsekya pangwüi nange olithule changnong-pünthomkya hia dyen-ngankya pangwüi nange ahaile.

⁷Achongkya nang mongkün khokhoma ku nang hom to ngui ang thopu; Shwomle kue nang otsao Zangshwom-Hom ma achuak-achenle nang tong to akhux ang thopu.

⁸JOWANPA, ku ang zanpabu huanuma tüile! Nang mongtex lom to ku zunhüi; kue to angkya nang lomnu zinghüi ajitjuile.

⁹Ku zanpabu kax to chemtuechu mongong fang münchang; hwome zia ama angkya tata lomle. Hwom zangwün a jonai ma, zamzale münchang, mik-amüt hia khualop zangwüne awangle tüile.

¹⁰Hwom to thajao üntoxle sikngün ang tomkox, O Jowanpa; hwome azuakya katzuae hwomli thu ang tomkox. Nang ngwotnui angkya hwom jwonle apaokox chemthüikoxle hwom ochax huanu changle tamchu hwome nang füi alün-aloxle tüile.

¹¹Nang ma khosün atakkyabu pangwüi mongmüiüi; hwome jento mongsom hanpak tsai ngao ang thoüi. Nang to mongkünkyabu kho-awa koxle; hwom a nang khoma otsingtsing mongmüile tüile.

¹²JOWANPA, nang kax ma laxle tüikyabu to nange mohimanle; nang mongküne hwom to di thatha ma thale.