Read Wancho Naga Münchuak-Tsai 50 Bible Online

Münchuak-Tsai 50 - Wancho Naga bible

Münchuak-Tsai 50

¹Khüthak Zang, JOWANPA akaxle; handün hia hannop tokya zangfang pangnu chixe nyakle.

²Zang-e, osün müikya ma okhonguile tüikya Zaion makhange fale.

³Kem Zang nguile ngole, ikoxle dangjajale münchang; tüle zaxkya wün chix tunthoma tüile, tüle shixkya zangtsak-zangdung chix akhople tüile.

⁴Mikngün kaxkhi ang chixe ding-hi-hax sele chixe chix khünaknu kaxfünkya to hua ang a.

⁵Chixe thüi: “Ku to mongong thomkya ku khünaknu asoxhüi, tö hia danbu koxkya makhange ku füi Tsaotsüt laxkyabu a.

⁶Zangdingbue Zang a otsao changle le, ilaxle kaxfün pa a chix jao changpule angaile. Selah

⁷“Apahüi, ku khünaknu, kue akax fang; Israel, kue nang a thaidaoa, le kaxkhi koxüi. Ku a Zang, hünzom Zang changpu.

⁸Hünzome koxkya töbu khoma kue hünzom to sa-makya münchang, hünzome jento ku hato apüile koxkya zokle ashunkya töbu khoma münchang.

⁹Üntoxle kue hünzom müitsom nui angkya maihupongbu münlom chichangba nang müizyembu kha angkya zwonbuchu münlax;

¹⁰faokha angkya müi pangwüi ku kux üntoxle hajat-hajat haxnubu ma tüikya maihu bakle ku kux.

¹¹Fao angkya osa pangwüi ku kux zimfa ma awangle tüikya zünmok ku kux changpu.

¹²“Ku ang woknokoxba, kue nang ma süt münjuse, chaxwannu hia ima atüitüi komkaile ku kux changkoxle.

¹³Kue maihupong omüi saxle lehia chichangba zwonjibu lingle lehia?

¹⁴Nang ang münchong fakya a Zang tökya ang naxchang kox, üntoxle nange tsaosaxdaokya oli pangwüi Khüthak Zang ang laxkox.

¹⁵Thangnak apong pongma ku selax; kue nang khosünüi, ilaxle nange ku achuaküi.”

¹⁶Ikoxlechu chichang-chizangkyabu füi Zang-e akax: “Hünzome büthüikoxle ku kaxtombu e-ngopu? Hünzome ku Tsaotsüt bama zang omalax ang wünngopu?

¹⁷Hünzome ku ang hünzom achangle zing ang chitom; hünzome ku kaxtombu chilaxle awüt.

¹⁸Hünzom a hünzome ngünpupu ahuxmixbu füi zuikhui ang achang, ilaxle hünzom a ma tsangtsa hangkya mixcha hwom füi asox.

¹⁹“Hünzom a ochax zangwün ang othuithuima achwonle ngopu; hünzome atse ang ojao chizapu.

²⁰Hünzom a ma-mixbu ma kaxhux-fe ang othuithuima chwonle ngopu, hwom ma thaikya lomle atak angkya hanpakma a.

²¹Hünzome ibu pangwüi mokle tsuakpu, ikoxlechu kue chemchu chithüipu; ikhoma hünzome ku chuwüi hünzom lailaile tüipuixle thütpu. Ikoxlechu athax kue hünzom to sa-male changpu ilaxle zangwün hünzom hama ngaithole apua fapu.

²²“Ija kax apa koplax, hünzom ku ahaile changkyabu, chichangba kue hünzom oli thuüi, ilaxle hünzom khose angkya owachu chitüiüi.

²³Münchong fakya a ku achuakle tö koxkya changpu, ku kax ma laxle tüikya pangnusa kho kue sünüi.”