Read Wancho Naga Münchuak-Tsai 51 Bible Online

Münchuak-Tsai 51 - Wancho Naga bible

Münchuak-Tsai 51

¹O Zang, ku to chingcha hüi, tamchu chizakkya nang mongkün tokhange. Nang jaja chongkya makhange ku ochaxbu fwotle amüt hüi!

²Ku onu-oma pangnu sole fahüi üntoxle ochax tokya ku atsaohüi!

³Kue ku thaikya tsingle laxle; ku a ku ochaxbu hanpakma khangka hingle tüile.

⁴Kue nang zongto ochax lyenle tüidaoa: nang tata zongto a: ilaxle nange chem münsule thüipuix, kue ija mokdaoa. Idaile nange ku to kaxfün fa angkya asule tüile; ku thaikya ang achangkya tokhange nang sukya ang achangle.

⁵Ku a puxnyix tokhange wüi ochax changkya; anu wok ma tüitantokhange wüi ku a ochaxe awangle tüikya.

⁶Mongkoxkya hia otsingtsing a nange lomkya changle; nang je-hwone ku khangka awang fale.

⁷Ku ochax awüt hüi, ikoxtix ku tsaothale changüi; ku sole fahüi, ikoxle tix ku jun füi sütsele changüi.

⁸Mongmüi pwonla-tungkya ozing kue atat ang tomhüi; nange ku thule akhünle akhixdao koxchu, ku tamchatle mongmüi ang ataküi.

⁹Ku ochax ngünle laxüia nang mik achikdao, ku chichang-chizang pangwüi fwotle amüt fahüi.

¹⁰O Zang, ku ma mongtsaokya alaile fahüi, üntoxle khüzün hia otsao chasa ku ma shole fahüi.

¹¹Nang ngwotnui angkya ku asamle taxapao; nang Otsao Chasa ku angkya tswonle taxpao.

¹²Nang khosün makhange hüikya mongsom chatle ku ang fahüi, ilaxle nang kax ma laxle tüi angkya ku mong ma tsukya tüi ang tomkox.

¹³Ifüima ochaxbu hama kue nang kaxtombu apuaüi, üntoxle hwom a nang hato chatle achatüi.

¹⁴Ku khüzün panle toxhüi, O Jowanpa, üntoxle ku khosünle kop hüi, üntoxle mongmüi-pwonla atungle kue nang otsao apuküi.

¹⁵Jowanpa, akax angkya hanpakma ku to fonghüi, ilaxle kue nang achuaküi.

¹⁶Nange tö koxkyabu laxse chitsu, chichangba kue ibu kox ang chitho; zokle ashunle koxkya töbu füi nang ang mongzom chimüi.

¹⁷O Zang, puinaikya ku chasa a ku tö changpu; puinaikya hia mong alüixkya ku künmong nange pongle chikople müntüiüi.

¹⁸O Zang, Zaion to chingchakox üntoxle she to fongkox; Jerusalem katukbu azünle zingkox.

¹⁹Ifüima nange koxse olom ma koxkya töbu füi mongmüi ang kopüi üntoxle chu zokle ashunkya kwom töbu füi; ilaxle maihupongbu a nang tö-tsap ma tö koxüi.