Read Wancho Naga Münchuak-Tsai 56 Bible Online

Münchuak-Tsai 56 - Wancho Naga bible

Münchuak-Tsai 56

¹O Zang, ku to chingchakya tüihüi, chemthüikoxle ku a zansing sungkha ma tüile; ku zanpabue ku to othuithuima zothuple.

²Nyixtungtale ku zanpabue ku to single. Ku füi alünle azan angkyabu huanuma tüile.

³Chemtue ku zapuix, O Khüthak JOWANPA, kue ku mongong nang ma thompu.

⁴Ku a münza, kue Zang to mongongpu; chixe ku ang chem kaxtsao fapuix ija bama kue chix achuakpu. Khünak tomtatae ku to chemthüi thoüi?

⁵Nyixtungtale ku zanpabue ku ang tingtui koxle ngole; hwome othuithuima ku to chemle mak-khahaxle ajang ngole!

⁶Hwom a chwon ma asoxlaxle kue mokkya pangwüi to hule ngole, ilaxle hwome ku mik-amüt ang tsuaküile mongchongle.

⁷O Zang, hwom to hwom ochax khoma sikangünkox ; khünak ibu to nang mongtsik ma lüt ang tomkox!

⁸Ku chemtukuxle tingtui ma ngopuix nange awan-ngopu; nange ku mikfi ajenkyabu lai ma zale thompu. Ibu nang laipex ma akiakle müntüidaihi?

⁹Kue to nang nyakkya nyix, ku zanpabu anongle chatüi. Kue ija awanle, Zang a kuchima tüile.

¹⁰Owa kaxtsao bama kue achuakpuix, ija JOWANPA a.

¹¹Kue chix to mongongpu, ilaxle ku ojao münza. Khünak tomtatae ku to chem chemthüithoüi?

¹²O Zang, kue tsaosaxle changdaokya kue nang ang koxpu; münchong fakya ku tö kue nang ang koxpu,

¹³chemthüikoxle zikmüt-mangkho tokya ku nangetix sünpu ilaxle ku to lüt ang chitompu. Ikhoma ku Zang womkya ma ahampu, ozün ma tüikyabu to nyankya zangngai ma a.