Read Wancho Naga Münchuak-Tsai 68 Bible Online

Münchuak-Tsai 68 - Wancho Naga bible

Münchuak-Tsai 68

¹Zang ajong laxle chix zanpabu afale apao. Chix thua anule ngokyabu to lütlaxle azik apao.

²Chemle wünkhut afongle awütpuix, ilailaile chixe hwom jwonle apao; chemle müizao wünzui ma chule paopuix, ija lailaile ochax khünakbu Zang tuntho angkya samle pao.

³Ikoxlechu otsao khünakbu a chix womle tüikya to mongmüile; hwom a mongmüi-pwonla atungle akhongle.

⁴Zang ang tsai ngaokox, chix mün achuakle ngaokox; owa zangfwom khoma ngale tüipuix, chix lomtang achwonkox; Chix mün a JOWANPA changle: chix womle tüikya to mongmüikox!

⁵Zang, owa chix Zangshwom-Hom ma ngopuix, chixe zomnu hia khaxsa hwom to humele.

⁶Ma tata ngokyabu chang chix ngwotnui koxle ilaxle kople thomkyabu danle khangkho angaile, ikoxlechu chix zongto apüile tüikyabu a khünak chingokya haxtok to ngo angkya laiüi.

⁷O Zang-e, chemtue nange nang khünaknu lomzunle changüihex, chemtue nange sak-hax akaile leüihex, Selah

⁸ipongma chaxwannu kangle pao, üntoxle Sinai haxnu Zang nguikya, Israel nok Zang nguikya khoma zangdinge zangwat thokle ajo.

⁹Nange okhonguile zangwat wat ang tom üntoxle zanle zua paoünkya nang haxtok chatle chat ang tom;

¹⁰nang khünaknue ikhama hwom hom-hax zaile chang; ija a nang müikya khoma mixshix-zasabu ang nange koxkya changle.

¹¹Jowanpa-e kaxtom fa, üntoxle sheko-mixnubue ija kaxho pao:

¹²“Wanghombu hia hwom süpahibu a zikle paongole!” Sheko-mixnubue hom ma chem kople apüipuix ibu ahan:

¹³baozangbu hun tsao-tsao füi jikjeple tüikya, khop-jan füi lilaxle osu zingle tüikyabu a. (Azankya nyix hünzom züizüi büthüikoxle chunzyem khato jiple ngo?)

¹⁴Chemtue Khüthak Zang-e Zalmon Haxnu angkya wanghombu afale afanpuix, ipongma chixe ikhato junbu düt ang tom.

¹⁵Bashan haxnu a chemtukuxkya chongkya haxnu hex, tsuakya haxnukhobu füikya haxnu a!

¹⁶Tüle chongkya nang Bashan haxnukho ma zangshwomkyabue JOWANPA ngokya haxnukho ma zangshwomkyabu to büthüikoxle tsak-khule tüipu? JOWANPA ikhato othuithuima ngo angkya changle!

¹⁷Tüle zong tüikya chix man-kanlin ojat-ojat füi Sinai tokhange Jowanpa Otsao Nui to ngui.

¹⁸Atsuakya khato chix dong, chix füi tomle zandabu koplaxle; alün-aloxle tüikya khünakbu chak tokya chixe hinghobu pongle lax. JOWANPA Zang a ikhato othuithuima ngoüi.

¹⁹Jowanpa achuak kox, chixe nyixfokya to kem hünlit hünle; chix a kem khosünkya Zang changle. Selah

²⁰Kem Zang a khosünkya Zang changle; chix a JOWANPA, kem Jowanpa changle. Zikmüt mangkho tokya kem chixe tix sünpu.

²¹Tütakoxlechu Zang-e chix zanpabu khang ashixüi jao. Ibu zanpabu a hwom ochax ma wüi ngoüihexle angamkyabu changle.

²²Jowanpa-e thüi: “Kue Bashan tokya nang zanpabu chatle apüiüi; kue hwom a tinu jithong tokya chatle apüiüi,

²³ija a, hünzom hwom aji ma ashan angkya hanpakma, ilaxle hünzom hibue tsuakkya pongle naxchaikox.”

²⁴O Zang, nange zan to anaolaxle sungdün ngadongle ahamkya pangnusae wüi ngündaoa, Zang, ku wanghompa, chix otsao nui to nguikya a.

²⁵Tunthochi ma a tsaipabu, tokfüichi ma a thuaput-waxmai füikyabu, otan ma a khopsya akhaole naochabu.

²⁶“Chix khünaknu tusox ma Zang achuak-achenkya tüikox; Jakop su-sa hwom pangnue JOWANPA achuak-achenle changkox!”

²⁷Pongma ahixkya Benjamin homjen ngui, ifüima Judah angkya lompabu hwom othom laxlaxle, Zebulun hia Neptali angkya lompabue azuile hüi.

²⁸Nang tsak-zong ahohüi, O Zang, kwom hanpakma twonkya nang tsak-zong

²⁹Jerusalem angkya nang Zangshwom-Hom makhange. Ijongkha a wanghombue nang hato hinghobu apüikya onui changle.

³⁰Ijip nok to sakox, acha tham to ngokya ibu faomüi to a; onokbu to sakox, husabu füi tüikya maihupong ozyem füia, hwome nang tong to akhuxlaxle nang ang hwom khop-jan koxle machang tanto a. Zan alaisele tsukya khünak ibu afale pao ang tomkox!

³¹Alixachongbu Ijip nok tokya ngui angkya changle; Etheopia noke Zang to jople hwom chakbu nwonüi.

³²Zang hato tsai ngaokox, chaxwannu wangtingbue, Jowanpa achuak-achenle tsai ngaokox, Selah

³³owangpongma zingkya zangdingkho otok ma ngale ahamkya Zang ang a. Tsakzong chongkya füi chix ahungle akhongkya zing apalax.

³⁴Zang tsak-zong bama khuapukox; Israel nok khangkho ma chongwangpa chix tüile, chix janzüi a zangdingkhobu to tüile.

³⁵Chix otsao ngwotnui angkya nguipongma Zang ngünlaxle chemtukuxle mong anyonkya tüipuix: Israel nok Zang nguipongma a! Chixe chix khünaknu ang janzüi hia tsak-zong kox. Zang achuak kox!