Read Wancho Naga Münchuak-Tsai 71 Bible Online

Münchuak-Tsai 71 - Wancho Naga bible

Münchuak-Tsai 71

¹JOWANPA, ziakople fa angkya mix lomle ku nang hato hüipu; otuechu ku to lüt ang taxtom!

²Chemthüikoxle nang a otsao changle, ku to fongfa üntoxle ku kho awa fa. Ku kax apahüi tamchu ku khosünle fahüi!

³Chaza chitüile ku zak-zui angkya nui ang achanghüi üntoxle chu ku kho awa angkya hanpakma shingmongle ziakop thomkya zün; nang a ku khangkhomnui tamchu ziakopkya zün changle.

⁴Ku Zang, chichang-chizangkyabu chak tokya ku azünhüi, mongtsik mix hia ochax khünakbu chak tokya a.

⁵Khüthak JOWANPA, kue ku mongong nang to thompu; Ku naosom pongto khange wüi kue nang to ongle hüipu.

⁶Ku tsünjangmasule nang to onglax ngopu; ku puxnyix makhange wüi nange khosünle thompu. Kue othuithuima nang achuak-achenle changüi.

⁷Ku tsün a khünaknu hanpakma tuita apyen angkya tsün changpu, chemthüikoxle nang a tsak-zong füikya ku ziakopmix changpu.

⁸Han ahomle kue nang achuakpu ilaxle nang fuazang apukpu.

⁹Athax ku azudaoale awütle taxtox; athaxpi azuk-atsya ündaile ku danle taxtox.

¹⁰Ku zanpabue ku langle awüt-se tsule; hwome ku mo amale wünle ilaxle ku zan to ka ang tungle.

¹¹Hwome thüile: “Zang-e chix dantoxdaoa; hai chix füito zik-hax üntoxle chix kop-hax; chix kho awale kop angkya mix owachu müntüi.”

¹²O Zang, nang tsailo to sütaxngo; ku Zang, ku to fong ang momlax!

¹³Opange ku to singpuix hwom to lütlaxle amüt ang tomkox. Opange ku to mak-kha ang azongpuix hwome zakkop laxle chingcha chitüile max ang tomkox.

¹⁴Kue othuithuima ku mongong nang ma thomüi; Kue nang sisile achuaküi.

¹⁵Nang müikya bama kue wünwüi wünüi; han ahomle kue nang khosün mo wünle changüi, nang mongkün a kue tsingtsuakkya sasa chichang.

¹⁶Ku a JOWAN Zang tsak-zong ma paoüi; kue nang müikya, nang tata müikya bama apuküi.

¹⁷Ku naosa ma tüitanto tokhange wüi nange ku hama anwot-anole fapu, üntoxle athaxchu kue nange ohünotün mwotbu mo wünpu.

¹⁸Athax ku azudaoa ilaxle kho thole changdaoa, O Zang, ku danle taxtox! Kue nang tsak-zong hia janzüi bama khuapule changpongma ku füi ngohüi hüile ngokya tsüntsün ma a.

¹⁹Zang, nang otsaoe zangdingkho alople tüile. Nange tüle chongkya mwot mokle tsuakdaoa; nang lailaikya owachu müntüi.

²⁰Nange ku hato sikngün tuitaibu ahüi, ikoxlechu nange wüi ku tsak-zong chatle chat ang tomüi; nange ku zuk-kha tole ang müntom.

²¹Ile tümachangtox le nange ku achenüi; nange ku tamchatle mong asomüi.

²²Kue otsingtomtata ma thuaput waxmaibu füi nang achuaküi; kue chialekya nang mongong bama nang achuaküi, ku Zang. Ku thuaput waxmai ma kue achuakle tsai ngaoüi, nang a Israel nok Otsao Zang changle.

²³Kue nang hanpakma thuaput waxmai mütle changpongma akhongüi mongmüile; ku khüzün pangnu makhange ku ngaoüi chemthüikoxle nangetix ku khosünkya changle.

²⁴Han ahomle kue nang otsao mo wünüi, chemthüikoxle ku to mak-kha ang azongkyabu pangwüi to lütlaxle hwom chingcha ojao chitüile asamdaoa.