Read Wancho Naga Münchuak-Tsai 72 Bible Online

Münchuak-Tsai 72 - Wancho Naga bible

Münchuak-Tsai 72

¹O Zang, nang otsao füi kaxfün fa angkya wanghompa hama anwot-anole changkox; nang sukya kaxfün chix füi tom-hanle changkox,

²ikoxle tix chixe nang khünaknu thakma sukya kaxfün fakya füi apün-ada angkya hanpakma üntoxle mixfang to thomkyabu to otsao ma apün-ada angkya hanpakma.

³Haxtoke ahak-aluakya ma mongzom müikya naxtüi; ija otsao chem hex ija awanle naxkop.

⁴Mixshix-zasabu to wanghome masüi-mix-chilüile kaxfün naxfa; chitüi-chinangkyabu to chixe naxfong ilaxle hwom to afangle thomkyabu to naxlüt.

⁵Zanghane fakya mazak tanto nang khünaknue nang to shwomle naxngo, athax mahüikya hanpakmachu, lyetnue fakya mamax-mamaxle a.

⁶Wanghompa a haxtok ma zangwat ningle naxchang, chaxwan tok to dütkya nyenti ningle a.

⁷Chix tsün ma otsao a tüle putsale naxchang, ilaxle ahak-aluakya lyetnue fale ngokya kople naxngokox.

⁸Chix wangting a tinu makhange tinu alople tsale paoüi, Eufrat makhange haxtua-zangnam alople a.

⁹Sak-hax tokya khünakbu chix chitong ma akhuxüi; chix zanpabue ma alüile haxkha to tswonle awütüi.

¹⁰Spain nok hia shuazo angkya wanghombue chix ang hinghobu koxüi; Sheba hia Seba nok wanghombue chix hato töbu apüile koxüi.

¹¹Wanghombu pangnusae chix chitong ma akhuxle changüi; pangnu jat-lie chix thothale changüi.

¹²Chix to nyakkya mixshix-zasabu pangwüi kho chixe sünle, üntoxle chitüi-chinangkyabu hia e-ma chilaxle ahai thomkyabu chuwüi chixe sünle.

¹³Tsakzong chitüikya hia mixshix-zasabu to chixe chingchale; chitüi-chinang khünakbu khüzün chixe sünle kople.

¹⁴Mixe afangle thomkya hia chakmok-janlangle changkya chak tokya chixe hwom khosünle kople; chix zongto hwom khüzün a thalix changle.

¹⁵Wanghompa tsünlole naxngokox! Sheba tokhange chix ang hun naxfakox; othuithuima chix hato zangjop shozexle naxchangkox; Zang mohiman othuithuima chix ma naxngokox!

¹⁶Haxtok ma saxziak okhonguile naxtüikox; haxhuabu a sütli-linglie awangle naxtüikox, Lebanon haxtok angkya pünziak-laimobu ninglea. Tingnubu khünak-mixsae awangle naxtüikox, kothofa to fume awangkya ninglea.

¹⁷Wanghompa mün otuechu chialakle naxngokox; zanghannu tsün lokya tukuxle chix mün fua-hi-zangle naxngokox. Pangnu jat-lie Zang ang hwom to mohimanfa le naxthüikox chixe wanghompa to mohimankya lailaile a.

¹⁸JOWANPA, Israel nok Zang achuakkya tüikox! Ibu ohünotün mwot chix tatae mokle.

¹⁹Othuithuima fuazangkya chix mün achuak-achen kox! Chix fuazangkyae chaxwannu awangle naxchang. Amen! Amen!

²⁰Ija a Jesse sasün Dawid zangjop ashukkya changle.