Read Wancho Naga Münchuak-Tsai 74 Bible Online

Münchuak-Tsai 74 - Wancho Naga bible

Münchuak-Tsai 74

¹O Zang, nange ile kwom büthüikoxle danle tox? Nang khünaknu füi nang othuithuima mongtsikle ngoüi hia?

²Nang kaitanto wüi ma hanpak angle zünle kopkya nang khünaknu texle ataklax, hwom a nang saxthom ang lax angkya hanpakma zanda ang ngokya nange alaile apüikya khünakbu changpu. Ami nang ngotoxkya kha Zaion texle ataklax.

³Ibu owüiole pünle ama daokyabu ding to ahamlax; kem zanpabue Zangshwom-Hom ma tüikya pangwüi olithule amadaoa.

⁴Hünzom zanpabue Zangshwom-Hom ma hwome anaokya sungdünle akhong; hwome anaokya münwan ang ikhato hwome hwom nyiluak apik.

⁵Hwom a wabu füi pündakle anguakkya pündak mixbu ningle ngünle.

⁶Hwome wafax hia jantubu füi pün makhange zingkya pangwüi thuple ama.

⁷Hwome nang Zangshwom-Hom thuple atsun ilaxle ija to wün lang; hwome nang to shwomle ngokya onui chitsaokya kha ang achangle ama.

⁸Hwome kwom komkaile olithule akhünse tsu; hwome ija haxtok ma tüikya otsao nui pangwüi zokle ashun.

⁹Otsao münwan kwom kux komkaile amadaoa; ajepabu tuita danle chitox, ilaxle ija ile chemtukux ngo angkya hex owaechu chiawan.

¹⁰O Zang, kwom zanpabue nang cha chemtukux nyile ngo angkya? Hwome nang othuithuima adix-adale ngo angkya hia?

¹¹Nange kwom to münfongpule büthüikoxle angam? Nang chak nange büthüikoxle nang tokfüi chito thompu?

¹²Ikoxlechu, O Zang, owangpong tokhange nang a kwom wanghompa jao changpu; nange kwom obi thomthom ma hexle azünle hüipu.

¹³Akhokya nang tsak-zong füi nange tinu ahakthole anyi ang ahanpu ilaxle tinu khato tüikya müinu-nyaxpa khang to nange hongle ashix;

¹⁴nange müinu-nyaxpa Lewiathan khang thuple ashixpu ilaxle chix omüi a sak-hax tokya faomüibu ang asüt.

¹⁵Nange tümik hia shuasabu jenle ju ang tom; nange shuanu chongkyabu zople zan ang tom.

¹⁶Anyixning hia awünning nange lai ang tom; nange lyetnu hia zanghan hwom onuibu ma ngo ang tom;

¹⁷Chaxwannu ziathüt nangetix koxpu; tsonu hia zangwa nange zingpu.

¹⁸Ikoxlechu nang zanpabue nangcha nyikya texle ataklax, O JOWANPA, ibu a zang chitüikyabu üntoxle nang chilaxle awütkyabu changle.

¹⁹Chingcha ashukkya nang khünakbu ibu hwom zanpabu mongtsik chak to taxdan; zothup apongle ngokya nang khünaknu taxalak!

²⁰Nange kwom füi tsaotsütkya Tsaotsüt texle ataklax. Ija haxtok ma zangnak tüikya zongzong ma chakmok-janlangkya tüile.

²¹Mixe afangle thomkyabue zakkop ang taxtom; ibu tuimix-nuakmix hia chitüi-chinangkyabue nang achuak ang tomkox.

²²Zang, nang ajonglax, ilaxle nang füikya zangwün khoselax! Han ahomle zang chitüikya khünakbue nang chanyile ngokya texle ataklax.

²³Nang zanpabu mongtsik ashukle akhong ngokya taxalak, ojao chithwon nang zanpabue akhong ngokya zing a.