Read Wancho Naga Münchuak-Tsai 77 Bible Online

Münchuak-Tsai 77 - Wancho Naga bible

Münchuak-Tsai 77

¹Kue Zang hato zongbakle akhong sop; ku akhongle sop, ilaxle chixe ku zing atat.

²Tingtui dongpongma kue Jowanpa to zangjop; zang angaile zangjople kue ku chak nwon, ikoxlechu kue mongsom chikop tho.

³Chemtue kue Zang texle atakpuix, ku azak maxle; chemtue kue chix lomle changpuix, ku ang monghixle. Selah

⁴Chixe ku wüntungtale mik azangle ngo ang tom; kue kaxdün ang jao chithole khosamle.

⁵Kue kaitox daokya hanpakbu texle ano ilaxle kaiwüikya zangpuabu texle atak.

⁶Zudakle ajangkya bama kue zangnaknu akai; kue lomle ano, ilaxle ija a kue kuma alüile atüikya:

⁷“Jowanpa-e kem jento awütle thomüi hia? Chix tamchatle kem füi mong münmüi angpia?

⁸Chixe kem to mongkünkya dan dao pia? Chix kaxtsaobu otia ma müntüi hia?

⁹Zang-e chingcha angkya alakdao pia? Chingchajaja lüima mongtsike mix onui laxdao pia?” Selah

¹⁰Ifüima kue akax: “Akhole ku mong amakya a ija: Zang ma athax zong müntüi changa.”

¹¹Nang mwot tüpong-tüpongkyabu kue texle ataküi, O JOWANPA; Kaitanto nange mokkya ohünotün mwotbu kue texle ataküi.

¹²Nange mokdaokya pangnu bama kue ajangüi; Chongkya nang mwotbu otua kue lomüi.

¹³O Zang, nange chem mokpuix pangwüi otsao. Zang owachu nang ningle chongkya müntüi.

¹⁴Nang a ohünotün mwotbu mokkya Zang changle; nange jat-libu khato nang janzüi ahole,

¹⁵Nang tsak-zong makhange nange nang khünaknu khosün, Jakop hia Jusep su-sa hwom a. Selah

¹⁶Chemtue tinue nang ngünpuix, O Zang, hwom a nang thua tüle zale, ilaxle tinu jithongbu abünle aloxle.

¹⁷Zangfwom-e zangwat thokle ajole; zangding tokhange zangtsak zangdung laile, ilaxle pangnu chito zangchangjepe nyanle.

¹⁸Nang zangtsak zangdung atuile apao, ilaxle zangchangjepe fale chaxwan angai; chaxwannu a za üntoxle alox.

¹⁹Tinu tichap akaile nang aham; Tüle zukya tinubu tale nang le, ikoxle nang chaman ngün ang chikop.

²⁰Mosa hia Arun nyi ma hünlit koxlaxle, Chunnyetpa tuita lailaile nange nang khünaknu lomzun.