Read Wancho Naga Münchuak-Tsai 79 Bible Online

Münchuak-Tsai 79 - Wancho Naga bible

Münchuak-Tsai 79

¹O Zang, songsaribue nang haxtok tingtakle changdaoa. Hwome nang Zangshwom-Hom chitsaokya ang achangdaoa ilaxle Jerusalem a pünpakle ama toxdaoa.

²Hwome nang khünakbu mang okun-olae sax ang dantoxdaoa, nang dapa hwom mangbu faomüie saxlax-ole dantoxdaoa.

³Hwome nang khünanknu aji tijenkya lailaile ajendaoa; aji a Jerusalem pangnu khato tijenpupule jenle paole, ilaxle mangzu angkya mix tuita danle chitox.

⁴Tomzi chaxwanbue kwom cha nyile; hwome kwom chanyi üntoxle haole ada.

⁵JOWANPA, nang a kwom füi othuithuima mongmale ngo angkya hia? Nang mongtsik a chizakle wün ningle chuale ngo angkya hia?

⁶Nang mongtsik a nang to shwom-tole chichangkya tingnok hato apaokox, nang to jop-tole chichangkya khünaknu hato a.

⁷Chemthüikoxle hwome nang khünakbu langle awütdaoa; hwome nang tingnok komkaile pünle ama toxdaoa.

⁸Kwom pupa hwom ochax khoma kwom sik taxangün. Athaxpi kwom to chingchajaja hüi; Kwome kwom monghom bakle amüt laxle ngole.

⁹O Zang, kwom to asunhüi ilaxle kwom khosünle kop-hüi; nang mün-mün wüi achuak-achenle naxngofa, kwom azünhüi ilaxle kwom ochaxbu thailak tüihüi.

¹⁰“Hünzom Zang a ojongto tüi?”, le, mixnokbue kwom ma büthüikoxle atüi? Nang ibu nok to sikangünkya kwome ngün ang tomhüi, chemthüikoxle hwome nang dapabu aji huanuma ajenle changdaoa.

¹¹Kople kun to thomkyabue wotkya zing atatlax, mik-amüt angkya kaxfün tsuakdaokyabu ibu chongkya nangtsak-nangzong makhange danhüi.

¹²Hwome ibibile nang adix-adale changdaokya khoma Jowanpa, mixnokbu ang othom anüte bole thama apong ang tomkox.

¹³Ifüima, kwom nang khünaknu, nang chunzyem kha angkya chunbue, kwome othuithuima nang ang münchong faüi ilaxle jento nang achuak-achenle ngoüi.