Read Wancho Naga Münchuak-Tsai 86 Bible Online

Münchuak-Tsai 86 - Wancho Naga bible

Münchuak-Tsai 86

¹JOWANPA, Ku kax apahüi üntoxle ku to lanhüi, chemthüikoxle ku a fongmix owa chitüile shonaikya mix changle.

²Zikmüt-mangkho tokya ku azünhüi, chemthüikoxle ku a nang kax ma laxle nang thothakya mix changle; ku khosün hüi, chemthüikoxle ku a nang dapa tuita nang to mongongle ngokya mix changle.

³Nang a ku Zang, idaile ku to chingcha tüihüi; han ahomle kue nang to jop-topu.

⁴O Jowanpa, nang dapa mong amüihüi, chemthüikoxle ku zangjopbu a nang hato dongle.

⁵Nang a kwom zongto müile tamchu kwom ang thailak tüile, nang to jop-tokyabu hanpakma chizakle künkya nang mongkün tüile.

⁶JOWANPA, ku zangjop to apahüi; fonghüile ku sopkya zing atat-hüi.

⁷Sikngün pongma kue nang to nyakpu, chemthüikoxle ku zangjop to nangetix lankoxle.

⁸O Jowanpa, nang lailaikya zang owa müntüi, nange mokkya mwot owaechu mamok.

⁹Nange zingle alaikya jat-li pangnusae wüi nang tong to nguilaxle akhuxüi; nang chongkya hwome achuak-achenüi.

¹⁰Nang a tsak-zong ma akhokya mix üntoxle ohünotün mwotbu mokle; Zang a nang tata tixwüi.

¹¹Nange ku ang chem amokse hex ku hama anwot-anole fahüi, ilaxle chialekya mongong füi kue nang kax ma laxüi; komkaile mongkoxkya füi ku hama nang thotha angkya anwot-anole fahüi.

¹²O Jowanpa ku Zang, kue ku künmong füi bakle nang achuaküi; othuithuima kue nang chongkya bama khuapuüi.

¹³Chizakle ku tokya nang mongkün chemtukux chongpuix! Nange ku zuk-kha tokya jao khosünle kop.

¹⁴O Zang, mong-ngam füikya khünakbu ku füi alün ang nguile; mongtsik ashukkya othom tuitae ku lang ang tungle ngole: nang to ojao mong chikoxkya khünakbu a.

¹⁵Ikoxlechu, O Jowanpa, nang a chingcha hia mongkün füikya, othuithuima adukya, mongkün chingcha üntoxle chialekya mongong füikya Zang changpu.

¹⁶Kuchi to huhüi ilaxle ku to chingchahüi; ku tsak-zong ang tomhüi ilaxle khosünle kop-hüi, chemthüikoxle anue mokdaokya ningle kue chu nang thothapu.

¹⁷JOWANPA, nang müikya ku hama angaile ahohüi; nange ku mongsom koxle fongkya chemtue ngünüihex ku to miktsakle ngokyabue zakkopüi.