Read Wancho Naga Münchuak-Tsai 89 Bible Online

Münchuak-Tsai 89 - Wancho Naga bible

Münchuak-Tsai 89

¹O JOWANPA, othuithuima kue janchiabakya nang mongkün bama tsai ngaoüi; kue chialekya nang mongong bama othuithuima apuküi.

²Nang mongkün a othuithuima ngoüile kue awanle, chemthüikoxle chialekya nang mongong a zangdingkho lailaile otyatya.

³Nange thüipu: “Kue kamle kopkya khünak füi kue longzütle kaxfünpu; Kue ku dapa Dawid füi tsaosaxpu,

⁴‘Nang sixli makhange jento wanghom ang achang ngoüi; kue nang wangting tsüntsün hanpak ang sünthomüi.’” Selah

⁵Zangdingbue nange mokkya ohünotün mwotbu bama tsai ngaole; otsaobue chialekya nang mongong bama tsai ngaole, JOWANPA;

⁶JOWANPA, zangkangting to nang lailaikya owachu müntüi; ding tokya zünmok tütali chu nang füi tawüi le thüi angkya müntüi.

⁷Otsao nguawangbu tusox ma nang thua zapu; hwome pangwüi nang ngünlaxle abütle ajongpu.

⁸JOWANPA Khüthak Zang, nang lailaile tsak-zongkya owachu müntüi; O JOWANPA, nang a pangnuli to chialekya mongong füi ngopu.

⁹Huanuma tsak-zongle tüikya tinu shinthuk thak machu nange apünpu; nange ija mongtsik tichap adang ang tho.

¹⁰Nange müinu-nyaxpa Rahap zutle akhixpu ilaxle ija langle awütpu; nang janzüi chongkya füi nang zanpabu anao.

¹¹Zangkangting a nang kux, chaxwannu chuwüi; chaxwannu tamchu ima atüitüi pangwüi nange zingpu.

¹²Shuakux hia shuathong nange zingpu; Tabor hia Harmon haxnubue nang füikya mongmüie tsai ngaole.

¹³Nang chemtukux tsak-zongle tüipuix! Nang janzüi chemtukuxle chongpuix!

¹⁴Nang wangting chifün a otsao üntoxle sukya changle; nange mokkya pangnu khato chialekya mongong hia mongkün ahole.

¹⁵Tsai ngaokya füi nang shwom-tole changkya khünakbu chemtukuxkya mongmüi hex, nang chingcha zangngai ma ngokyabu a!

¹⁶Nang khomatix hwome han-ahomle mongmüi-pwonla ang kople, ilaxle hwome nang müikya khoma nang achuakle.

¹⁷Nange kwom ang tholün chongkyabu koxle; nang mongkün ma nange kwom zan to lütkyabu ang achangle.

¹⁸Nange, O JOWANPA, kwom kho-awapa zünle kop; nang, Israel nok otsao Zang-e kwom ang wanghom koxpu.

¹⁹Mikngün-ohün ma kaitanto wüi nange chialekya nang dapa füi akax: “Kue zangle wünkya süpahi to fongdaoa; kue khünaknu kha angkya kamle kopkya mix ang tüntong koxdaoa.

²⁰Chix to münga füi lilaxle ku dapa Dawid kue wanghom ang zingdaoa.

²¹Ku janzüi othuithuima chix füi ngoüi, ku tsak-zong makhange chix zongtüi ang tomüi.

²²Chix zanpabue chix to otuechu münlütüi; chichang-chizangkyabue chix to lüt ang münthoüi.

²³Kue chix zanpabu thule akhünüi ilaxle chix to tsakkyabu pangnusa mik amütüi.

²⁴Kue chix to mongkünüi ilaxle chix to kax ma laxle ngoüi; jento kue chixe lüt ang tomüi.

²⁵Mediterenian tinu makhange Eufrat shuanu alople kue chix wangting akhaoüi.

²⁶Chixe ku ang thüiüi, ‘Nang a ku apa tamchu ku Zang changle; nang a ku kho-awapa tamchu khosünpa changle.’

²⁷Kue chix pongwang ma puxkya ku sasün ang zingüi, wanghombu pangnu füi achongkya ang achangüi.

²⁸Kue othuithuima chix füikya ku kaxtsao otia ma thomüi, ilaxle chix füikya ku Tsaotsüt tsüntsün to ngoüi.

²⁹Zangding ningle chix wangting a othuithuima ngoüi; ilaxle chix su-sa hwom khakha angkya wüi wanghom ang ngoüi.

³⁰“Ikoxlechu chix su-sa hwome ku wanlom kax ma chilaxle jangchang üntoxle ku kaxtombu ningle ngole chichang,

³¹hwome kue adangle fakya ema chilaxle jangchang üntoxle ku kaxtombu chithomle jangchang,

³²izuma hwom ochaxbu khoma kue hwom sikangünüi; hwom thaikyabu khoma kue hwom fuxtsüi ang tomüi.

³³Ikoxlechu kue Dawid to mongkünkya münzak chichangba chix füikya ku tsaosüt chithom homle müntüi.

³⁴Chix füikya Tsaotsüt kue münama chichangba chix füikya ku tsaosüt achatle münlax.

³⁵“Pangnu hanpakma tamfang ma kue ku otsao mün ma tsaodaoa; kue chemtuechu Dawid füi atsele münchang.

³⁶Chix ang jento sixlibu tüile ngoüi, üntoxle kue chix wangting to zanghan tüile ngokya kople hule ngoüi.

³⁷Ija a chijüile lyetnu ningle ngoüi, ding angkya chialekya ding angkya kaxkhi tuita ningle.” Selah

³⁸Ikoxlechu nang a zünle kopkya nang wanghompa füi mongtsik; nange chix chilaxle ahaile awütdaoa.

³⁹Nange nang dapa füikya Tsaotsüt amadaoa ilaxle chix wanghom khohom a haxthom khato awütdaoa.

⁴⁰Nange chix tingnu angkya katuk atsundaoa ilaxle chix zanhunuibu atsunle toxdaoa.

⁴¹Le-zyenüi khünak pangnusae chix bwot-babu ahuxle pao; chix tomzibu pangnusae chix chanyi.

⁴²Nange chix zanpabu ang chix to lüt ang tomdaoa; nange hwom pangwüi mongmüi ang tomdaoa.

⁴³Nange chix chang-paxbu mwot-to chithapkya ang achangdaoa ilaxle zan ma chito wüi anao ang tomdaoa.

⁴⁴Nange chix chongwang kiathox tswonle paodaoa ilaxle chix wanghom tüntong hax to dakle atsundaoa.

⁴⁵Hanpak mangui tanto wüi nang chix azupa ang achangdaoa ilaxle künmax-mongshankyae chix to alum ang tomdaoa. Selah

⁴⁶JOWANPA, nang othuithuima azwonle ngoüi hia? Nang mongtsike wün lailaile chemtukux zokle ngoüi?

⁴⁷Ku tsün chemtukux moxpuix texle ataklax; nange kwom pangwüi zile pao angkya tuita ang zingle alaikya taxalak!

⁴⁸Tamchu chizi-chimaxle owapi ngo ang thoüi? Kwom khünake büthüikya to ma alüile zuk-kha füi atsaile thomtsuaküi? Selah

⁴⁹Jowanpa, amipongma nang mongkün ahokünu omamaxün? Nange Dawid füi tsaosaxkyanu omalaxdao?

⁵⁰Ku, nang dapa to, chemtukuxle adix-adale changpuix, ija taxalak, Songsaribu othuak-ozom pangwüi kue chemle adupuix

⁵¹O JOWANPA, nang zanpabue nange zünle kopkya wanghompa tha-ajaole! Chix apaopao khato hwome chix tha-ajaole.

⁵²Othuithuima JOWANPA achuak kox! Amen! Amen!