Read Wancho Naga Münchuak-Tsai 94 Bible Online

Münchuak-Tsai 94 - Wancho Naga bible

Münchuak-Tsai 94

¹JOWANPA, nang a sikngün fakya Zang changle; nang mongtsik aholax!

²Nang a kwom pangnusa kaxfünpa; zolax ilaxle ngamkyabu ang hwome chem kopse hex ija laxkox!

³Chichangchizangkya khünakbu chemtukuxle mongmüi ngoüi? JOWANPA chemtukuxle?

⁴Mütkopmixbu chemtukuxle ngamle ngoüi tamchu hwome mix mik amüt-tsuakkyabu bama chemtukux tsaichong-kaxbongle ngoüi?

⁵JOWANPA, hwome nang khünaknu thule akhünle; nang kux ang ngokyabu to hwome chifa fang ma thomle.

⁶Hwome zomnu hia khaxsa hwom langle, üntoxle kem haxtok ma ngole tüikya mixnok wünpabu langle.

⁷Hwome thüile: “JOWANPA kwom mün-ngün; Israel nok Zang-e mün-ngün.”

⁸Ku khünaknu, hünzom a iningkya ongat-onguibu ang chemle achangüi? Hünzome chemtue awanle laxüi?

⁹Zang-e kem nabu zingle koxpu: chixe atat ang müntho lehi?

¹⁰Chixe jat-libu to sa: chixe hwom ang sik münangünpia? Chix a pangnusa hanpakma nwotmix changpu: chix ma tütali hwon-je müntüile hia?

¹¹JOWANPA hwom mongjang awanle lax; tutex ojao chitüikya hwom mongjang chemtukuxkya hex chixe awanle.

¹²JOWANPA, nange adangle fakyabu tamchu nange nang wanlom anwot-anole fakya khünak hanpakma chemtukuxkya mongmüi changpuix!

¹³Chichangchizangkyabu aman angkya hanpakma tswomkha thole machang tanto sikngün hanpak-zanghanbu chak tokya nange hwom ang nazak fapu.

¹⁴JOWANPA chix khünakbu danle müntoxüi; opang chix kux changpuix, ibu chixe tsiakle müntox.

¹⁵Khwabu ma tamchatlechu sukya kaxfün atak ang kopüi, ilaxle otsao khünaknu pangnue ija to juafong.

¹⁶Chichangchizangkyabu füi alün ang ku hanpakma owa ajongpuix? Ochax mwot mokkyabu zan to ka ang kuchima sele owa ajongpuix?

¹⁷JOWANPA ku to chifong thüikoxba, ku a lebama wüi dangle ngo angkya chaxwan to leünse.

¹⁸Kue thüi: “Ku a dütngole”; ikoxlechu JOWANPA, chizakkya nang mongküne ku to fongle fa.

¹⁹Chemtue ku monge sungle tamchu abüt-abanle changpuix, nange ku ang mong asom ilaxle mong amüi.

²⁰Owae chisukya sukya ang achangpuix, owae müikya khünakbu to tungpuix,

²¹ilaxle thaikya chitüikya khünak mik max angkya kaxfün fale changpuix, iningkya chichangchizang kaxfün mixbu füi nang ang chem mwot chitüi.

²²Ikoxlechu JOWANPA ku kho-awale kop; ku Zang-e ku ziakop.

²³Hwom chichangchizangle tüikya khoma ibu to chixe sikngün ang tomüi ilaxle hwom ochaxbu khoma hwom amütüi; JOWANPA kem Zang-e hwom amütüi.