Read Wancho Naga Wanwünkax 1 Bible Online

Wanwünkax 1 - Wancho Naga bible

Wanwünkax 1

¹Israel nok wanghompa Dawid sasün Solomon wanwün-kaxbu.

²Ikhama je-hwon hia müikya zünsaikya kaxbu awan-atsing angkya tsaizu-kaxzukyabu ajatle awan angkya bama nang to fong angkya wanwün-kaxbu tüile.

³Ijabue nang to jetüi-hwonlangle tamchu otsingtsingma, sule tamchu masüi-mixlüikya chitüile ngotsuak angkya bama fongüi.

⁴Ijabue jali apongle hüidaokya khünakbu ma tsingtsang zaile chang ang tamchu tsünzün thom ang chemle sütlom-mwotlom awanle tüi ang tomüi.

⁵Wanwün-kax ibue jepabu je-hwon to janbo lang tamchu laitsing-ngakman mix lomzunle chang ang tsuakle,

⁶ikoxle tix hwome wanwünkax homongkha ma pyenle thomkya zangwünbu tamchu jepabue atüikya tsai-kaxbu awanle lax ang thoüi.

⁷Jetüi-hwonlangle chang angkya hanpakma nang owangpa ma JOWANPA thua zakop angkya changpu. Angabue je-hwon chathua zale münchang ilaxle tsing-wanle münchangpu le angamle.

⁸Ku sa, hünnu hia hünpa hwome nang füi akaxkya to nathale apalax.

⁹Chemle müikya khang-ngüi-nyi hia likwün füi nang sünmüi-joma ang achangpuix ija lailaile hwom hwon-nwot makhange nang zanglom-saikha müikya ang achangüi.

¹⁰Ku sa, chemtue nang hato thwontsing hüiüihex, ija nop ang taxkox.

¹¹Thütba hwome thüiüi: “Oman; owawa mik amüt ang lomhax! Chem-chitsingkya owawa to zap ang laxle singhax!

¹²Kem thoma hwom haxmüi-zangmale tamchu müimüi-zangngaile bang koxlax, ikoxlechu kem tokfüi ma hwom a omang ang changle bangüi!

¹³Abangbang thanu-juapa keme komkaile tsuiüi ilaxle ibu füi kem homkha awangüi!

¹⁴Oman; kwom khato hak-hax, ilaxle ahux-amangle kopkyabu kem pangwüie tom-hanle laxhax.”

¹⁵Ku sa, iningkya khünakbu füito taxpao. Ibu füi atsaile ngolax.

¹⁶Oma mwot mok ang hwom ma thuakjokkya ojao müntüi. Othuithuima hwom a mix mik-amüt ang a chwonle ngole.

¹⁷Nange kopsele tsukya osae hule ngopongma nya thakya ma chem olüi müntüi,

¹⁸ikoxle iningkya khünakbue alüile ma aman angkya kam thale ngopu, ija kam na hwom manle ziüi.

¹⁹Ahuxmix a huxmix chak ma lam: owa khünak changnong-pünthomle ngopuix, chix hanpakma ilele wüi changle hüipu.

²⁰Apakoplax! Tingjang-lomnu hia thalex-nuibu to je-hwone nyakle ngole,

²¹tingnu panbu ma tamchu khünak tunu asoxkya khama akhongle nyakle ngole:

²²“Ongat khünakbu! Hünzom ongat ma chemtukux okuilole ngose tsupu? Je-hwon wanjaikya ma hünzom ang mong chemtukux müingolaxüi? Hünzome otuechu tsing-wanle münchangtox pia?

²³Kue hünzom to sale changpongma apakoplax; kue hünzom ang müikya olom adangle fafang ilaxle ku je-hwon hünzom füi tom-hanle changfang.

²⁴Kue hünzom nyakle ngokya changpu, nguihüi le hünzom sengokya changpu. Hünzome kuchi to ojao na chitha.

²⁵Kue adangle fakya pangwüi hünzome ahai ilaxle kue hünzom achangle fa ang chitom.

²⁶Ikhoma chemtue hünzom füi tingtui apongle changüihex, kue hünzom chanyile changüi. Thamae hünzom khang to hongle changpongma kue hünzom wanjaiüi:

²⁷chemtue ija zangchei-zangwat ningle hünzom hato nguile changüihex, tüle-tüle chongkya thama apüile a, hünzom to tüle kaküi ilaxle jemax-hwonsamle changüi.

²⁸Ipongma hünzome je-hwon to nyaküi, ikoxlechu kue münlanüi. Hünzome ku pangnu chito lomüi, ikoxlechu hünzome ku münatak.

²⁹Hünzome chemtuechu je-hwon chitwon ilaxle JOWANPA kax ma münlaxpule angam.

³⁰Hünzome chemtuechu kue adangle fakya laxse chitsu chichangba kue hünzom achangle fapongma ija to na chitha.

³¹Ikhoma hünzome chem kopse hex ija hünzome kop angkya changle, ilaxle hünzom ma mwote alüile okak ang achangüi.

³²Jali lople hüidaokya khünakbue ku je-hwon chilaxle changkya khoma hwom mik max angkya ataküi. Ongat khünakbu a ija to mongkoxle chitüikya khoma thama apongle maxüi.

³³Ikoxlechu ku kax to nathale changkyabu khangkho azangle ngoüi. Hwom kho-azangle ngoüi, za-zyenle chang angkya chemchu müntüiüi.”