Read Wancho Naga Wanwünkax 11 Bible Online

Wanwünkax 11 - Wancho Naga bible

Wanwünkax 11

¹Tuakthüt müile chitwonkya khünakbu thua JOWANPA anule. Chix a tuakthüt otya ma thomkyabu füi mongmüile.

²Mongngam füikya khünakbu lebama wüi mongma kop angkya ataküi. Pui-hi-naile tüikya wüi jetüi-hwonlangkya changpu.

³Nang müikya mix jangchang, nang lom a mongtsaokyae zunpu. Mongong angkya chitüikya khünakbu a hwom mong chitsaokyae amütpu.

⁴Nange zik apongkya zuma nang ahak-aluale tüikyae chem hwon müntha, ikoxle mong ma thaikya chitüikya khünake ma khüzün sün ang tsuaküi.

⁵Küntsao-mongthakya khünak müikya khünak chabüt-lasünkya chitüile ngo ang tomle, ikoxle chichang-chizangkyae alüile ma max angkya atakle.

⁶Otsaoe küntsao-mongthale tüikyabu khosünle, ikoxle mongong angkya chitüikya khünakbu a ma tsün ma alüile manle.

⁷Chemtue chichang-chizangkya khünakbu zile paopuix, hwom füi tomle monghom chuwüi zile paole. Tuina tüinangkya to mongong-chalomle tüikya a chem angchu chichangle maxle.

⁸Otsao khünakbu a sikngün chak tokya kho-awa kople; itülüi ija chichang-chizangkya khünak hato nguile.

⁹Zang chilax homtoxle ngokya khünakbu zangwüne nang ang thama adün ang tsuak, ikoxle otsao khünakbu je-hwon makhange nang khangkho azang ang tsuak.

¹⁰Küntsao-mongthale tüikya khünakbu shomüi pongma tingsho ma mongmüi tüile, ilaxle chichang-chizangkya khünak tuita zipongma mongmüile akhongle.

¹¹Otsao khünakbue ma mohiman koxkya zuma tingnu tuita a chongkya ang achangle; ikoxle chichang-chizangkya khünak zangwünbu makhange tingnu hato omüt apüile.

¹²Mix tha ajaole akaxkya a ongat changpu. Nang tuita awankya mix jangchang, nang dangle ngoüi.

¹³Khualop mix owatochu huxsa zangwün bama mongong angkya müntüi, ikoxle owawa mongong koxle asule tüikya khünak to nange chalom ang tsuak.

¹⁴Lomzun tuita chitüi thüiningle jat-li tuita a dütüi. Anwot-anole fa angkya mix huanuma tüikya a tuita chalom.

¹⁵Nange mixnok wünpa thashe thom angkya tsaosaxle jangchang thüiningle, ija bama nange mongma ataküi. Iningkya zangwün khato chihakle changkya wüi nang zongto amüikya changüi.

¹⁶Chingcha füikya mixcha a achuakachenle, ikoxle jaja chitüikya mixchae mongma apongüi. Zaxkak mix ang otuechu ngunsyen müntüitoxüi,

¹⁷Nange chingchale changpongma alüile nang fün amüi ngopu. Ikoxle nang küntsik-mongmale jangchang, ijae alüile nang to maklaxüi.

¹⁸Otsingtomtata ma chichang-chizangkya khünakbue olüi chemchu münkop, ikoxlechu nange sukya mwot mokle jangchang, nange olüi kop angkya jao changpu.

¹⁹Owawae sukya mwot mok ang mong-zangwünkya jangtüidao ozün ma ngoüi, ikoxle thaikya mwot mok ang atsangle changkya mix a ziüi.

²⁰JOWANPAe tutex chichangchizangle tüikyabu thua anule, ikoxle sukya mwot mokkyabu to mongkünle.

²¹Ochax khünakbu to sikngün kox angkya nange tsingle ngopu, ikoxlechu otsao khünakbu a paole azang tsuaküi.

²²Müikya olom zünle lax ang chitikkya mixcha sünmüi-johang a waknu nadua angkya hun nasax ningle changpu.

²³Müikya khünakbue othuithuima müikyakya wüi ataklaxpu; chichang-chizangkya khünakbu hwome lomkya atakle laxkya zuma noknusa mongmapu.

²⁴Khünak züizüie hwom ngun-syen jansuma ashixle ikoxchu hwom sisile ahak-aluale. Züizüia huanuma khünzai, ikoxchu sümax-sümax.

²⁵Chaktom dale tüikox, jangchangba nang ahak-aluale tüiüi. Mix to fongkox, ikoxtix nang tochu fongüi.

²⁶Ofüima thamüikya hanpak tan ang saxziak tsyenle thomkyabu züizüi to khünaknue thuakzomle, ikoxle naxhang ang mongkho adünkyabu to achuakachenle.

²⁷Nang mongjang müile jangchang, nang e-sele changüi, ikoxle nang thama adün angkya lomle jangchang, nange atak angkya a ija changpu.

²⁸Ma tuina to mongong laxle ngokyabu a tso-hi-wa zit ma pünchak dütle paokya ningle changüi, ikoxle otsao khünakbu a zangtso pünchak mua müikya ningle changüi.

²⁹Ma kako hato tingtui apüikya khünakbu a oshukma chemchu münbang. Ongat khünakbu a jento jetüi-hwonlangkya khünakbu da ang achangle ngoüi.

³⁰Otsaoe khüzün fale, changnong-pünthomle tüikyae ija paole.