Read Wancho Naga Wanwünkax 12 Bible Online

Wanwünkax 12 - Wancho Naga bible

Wanwünkax 12

¹Je-hwon to mongkünkya mix owawaechu hwom thai pongma ija ngaile wüi fase tsule. Achangle fakya to chiluakya a ongat changle.

²Müikya khünakbu füi JOWANPA ang mongmüile, ikoxle chichangkya mwottho zingkyabu tha-ajaole.

³Chichangchizangle tüikyae khose angkya ataküile münchang, ikoxle otsao khünakbu a shingmongle ajongle.

⁴Müikya kakonu tuita a she kakopa münchong tamchu chix mongmüi changpu; ikoxle kakopae zakkop ang tomkya kakonu tuita a chix zongto za mongto kakpaxle shankya tuita ang achangpu.

⁵Sukya khünak tuitae nang to haxmüi-zangmale akox-akomle hu-meüi; chichang-chizangkya khünak tuitae a nang dyense tsuüi.

⁶Chichangchizangkya khünakbu zangwünbu a zikmüt-mangkho changle, ikoxle otsao khünakbu zangwün tokhange aza-anale thomkya mix azünüi.

⁷Chichangchizangkya khünakbue hwom thomle düt angkya atakle ilaxle osix-oli chemchu müntox, ikoxle otsao khünakbu homkha a kuimüi-zangmüile wüi ngole.

⁸Nang jetüi-hwonlang mix tuita jangchang thüiba, nang achuak-achenle changüi; nang a tuita ongat jangchang, khünaknue nang to asongle huüi.

⁹Owawa achongkya ang achang üntoxle woknuak ma ngokya füi tun hia chak apongkya chizakle ngokya zangjang khünak wüi sümüi.

¹⁰Müikya khünakbue ma tsom-pom to müile humele, ikoxle chichang-chizangkya khünakbu a hwom müi füi küntsik-mongmale changle.

¹¹Azongle mwot mokkya manzai mix ang süt okhonguile tüiüi, ikoxle chemchu chichang angkya to hanpak alyetle changkya a ongat changpu.

¹²Chichangchizangkya khünakbue lomkya a ochax mwot mok angkya lomle, ikoxle otsao khünakbu a shingmongle ajongle.

¹³Chichangchizangkya khünakbu a ma zangwünbu ma manle, ikoxle otsing khünakbu a ma alüile thama chak tokya azangle paole.

¹⁴Nang hingho a nang zangwün hia nang mwot füifüi; nang chem kopsehex ija nange kopüi.

¹⁵Ongat khünakbue jento hwom a münthaile ajangle. Jetüi-hwonlangkya khünakbue anwot-anole fakya to apaüi.

¹⁶Ongat khünak tuita mongtsik pongma thuakjok angkya müntüi, chixe lebama wüi ngaile faüi. Jetüi-hwonlangkya khünake ajao-adakya to na chithaüi.

¹⁷Chemtue nange otsingtsing wünüihex, sukya mwot moktsuakpu, ikoxle atsekyae chisukya mwot hato zunle paoüi.

¹⁸Chiajang homle wünkya zangwüne changlo füi tsunkya tukuxle mak-kha ang tsuakle, ikoxle ajang laxle wünkya zangwüne kak amüi ang tsuakle.

¹⁹Atsekya ma tsün münlo, ikoxle kaxtsing zangwünkya ma tsünlwot tüile.

²⁰Chichangchizang mwottho zingle changkyabu a mongtsik-mongma ma bütkop angkya changle, ikoxle müi angkya hanpakma mwot mokkyabue mongmüi kopüi.

²¹Otsao khünakbue chem oma münapong, ikoxle chichang-chizangkya hanpakma tingtui boma chemchu müntüi.

²²JOWANPAe atsele zangwünkyabu thua anule, ikoxle mae akax daokya ningle moktsuakkyabu füi chix ang mongmüile.

²³Jetüikya khünakbu a mae awankya bama dangle ngole, ikoxle ongat khünakbue hwom mongkho chinguikya apukle.

²⁴Azongle mwot mokkyae nang ang tsak-zong koxüi; zaxkak-mongdomkyae nang da ang achangüi.

²⁵Abüt-abankyae nang angkya mongmüi pale paoüi, ikoxle chingcha zangwünkyae nang ang pwonla adünüi.

²⁶Otsao khünak a chix zuikhui hanpakma lompa tuita changpu, ikoxle chichang-chizangkya khünak lomtange hwom othai to alyetüi.

²⁷Nang aole jangchang thüiba, nange chem lompuix, ija nange otuechu kop ang müntho, ikoxle nange azongle mokle jangchang, nange shomüi apongüi.

²⁸Otsao a khüzün lomtang changpu; chichang-chizangkya a zikmüt-mangkho lomtang changle.