Read Wancho Naga Wanwünkax 14 Bible Online

Wanwünkax 14 - Wancho Naga bible

Wanwünkax 14

¹Homkha a shekonu hwom je makhange zingpu, ikoxle ongat makhange ibu pünle amapu.

²Nang thaithaxle taxchang, ijae nang JOWANPA chathua zale tüikya ahole; thaithainyaile jangchang, ijae nang ile müntüile ahopu.

³Ongat mongngam khünake zang huanuma wünüi; jetüi-hwonlangkya zangwünbu füi hwom kho awaüi.

⁴Han lin angkya maihupongpa chitüi thüiningle nang pung a punghua ang changüi, ikoxle ibu tüile jangchang, ija a saxziak füi awangle changüi.

⁵Mongong tüitsuakkya khünake mike ngünkya otsingtsing kax ngaile, ikoxle mongong angkya chitüikya khünak tuitae othai boma chemchu münngai.

⁶Je-hwon wanjaile ngokya khünak tuitae otuechu ija münataktsuak, ikoxle je füi lomkya khünake ija ochwon ma atakle.

⁷Ongat khünakbu füi atsaile ngolax, hwome nang ang anole fa angkya chemchu müntüi.

⁸Tsingtsang füikya khünak ma je büthüikoxle tüipuix? Chixe chem mok angkya hex ija awankoxle. Angapa a ongat ang büthüikoxle changpuix? Ija a chixe pangwüi tikle ngole thütkya khoma changle.

⁹Ongat khünakbue ochax bama chemle chu müntex, ikoxle müikya khünakbue thailak tüitsuak angkya olom lomle.

¹⁰Nang mongmüi a nangkux jao; nang mongkak a nangkux jao. Ibu owaechu nang füi tom-hanle lax ang müntho.

¹¹Ochax mwot mokle ngokya khünak hom-hax pünle ama füima chuwüi müikya khünak hom-hax a ajong lüwüi ngoüi.

¹²Nange changkya lomtang changpule ajang ngokyae nang zikmüt-mangkho hatochu ahüi ang tsuak.

¹³Nyittun sünmüi to mongma pyenle thom ang tsuak. Chemtue mongmüi paole samüihex, mongma a otyatyale ikhama bangüi.

¹⁴Khünak chimüikyabue hwome chem kopse hex ija kopüi. Müikya khünakbu ang hwom mwot müikya khoma müikya hingho tüiüi.

¹⁵Ongat khünake chemningkya tochu ongüi; khünzaikya khünakbue hwom chikap to hungale ahamüi.

¹⁶Jetüi-hwonlangkya khünakbu a sikngün füi atsaile ngo angkya bama mik-hingle, ikoxle ongatbu a chem aju-ajangkya chitüile thüile mokle awütle.

¹⁷Mongtsik-künwün khünake ongat mwot mokle; jetüi-hwonlangkya mix dangjale ngole.

¹⁸Chemchu chitikkya khünake ongatbu chem kopsehex ija kopüi, ikoxle tsingzaikya khünakbue hwon-hi-je hingho kopüi.

¹⁹Ochax khünakbue otsao khünakbu tong to puile hwom chingcha lomüi.

²⁰Owaechu chitüi-chinangkya khünak to münlua, hwom tomzibue ngaxchu münlua, ikoxle hakpa-luapabu ang zuikhui huanuma tüile.

²¹Nang mongmüile ngose jangtsu, chitüi-chinang mix zongto chingcha füi tüikox; owawa ajao-ahaile changkya a ochax changpu.

²²Nange müi angkya olom ma mwot mokle jangchang thüiningle nange mongong hia e-sele tüikya kopüi; nang ochax hanpakma mwot mokle jangchang thüiningle, nang a thaikya ang changpu.

²³Azongle mwot mokkox jangchangba nang ozün ma ngo ang kopüi; nang kax-kax lanlanle ham-ham jangngo thüiningle zasa ang achangüi.

²⁴Jetüi-hwonlangkya khünakbu hingho ang tuina kopüi, ikoxle ongatbu a hwom nganguile changkya ma awanle laxüi.

²⁵Chixe otsingtsing wünle jangchang thüiningle mikngün kaxkhi makhange khünak khosünüi; ikoxle chix atsele jangchang thüiningle chixe khünak khohangüi.

²⁶JOWANPA chathua zakyae khünak tuita ang tamchu chix homkha ang mongong chalom hia khangkho sünkya tüiüi.

²⁷Nange zik tsiakle toxse tsupia? JOWANPA chathua zakya a khüzün tümik changpu.

²⁸Chongwanghom tuita zaxzang angkya a chixe khünaknu otukux to apün ang thopuix ija füifüi; hwom chitüi thüiningle chix a chem angchu münchang.

²⁹Nang dangle jangngotho thüiningle nang a jetüi-hwonlangkya mix changpu; ikoxle nang ma küntsik-mongwün tüile jangchang, nange nang chemtukuxkya ongat hex ija aho wüi.

³⁰Künsom-mongsom ma ngokyae tsangtsa fanmüile ngo ang koxle, ikoxle osing-nüfux a chimüikya kak tuita ningle changpu.

³¹Nange mixshix-zasa to adix-adale jangchang, nange hwom zingkya Zang to adix-adakya ang changpu; ikoxle mixshix-zasabu to chingcha ahole tüikya a tuita zangshwomkya mwot changpu.

³²Chichangchizangkya khünakbue ma thomle düt angkya a hwom ochax mwot khoma atakpu, ikoxle müikya khünakbu ziakople ngo ang kopkya a hwom to ngao angkya chitüile ngotsuakkya khoma changpu.

³³Je-hwon a jetüi-hwonlang mix mongjang ma tyale tüile; ongatbue je-hwon bama chemchu müntik.

³⁴Otsaoe jat-li tuita achenle; ochax a jat-li tüta hanpakma chu tsangmüt changpu.

³⁵Je-hwon füi sax-mokkya alixachong hwom füi wanghompa ang mongzom müile, ikoxle ibu mok ang chithokyabu to chixe sikangünle.