Read Wancho Naga Wanwünkax 15 Bible Online

Wanwünkax 15 - Wancho Naga bible

Wanwünkax 15

¹Zingmüi kaxlane mongtsik adangle, ikoxle kaxza zongkyae sisile mongtsik alaile.

²Chemtue jetüi-hwonlangkya khünakbue zangwünpuix, hwome tsing-wankya to mongzao ang tomle, ikoxle ongat khünakbu wikha makhange khangka ma chilekyabu alaile.

³JOWANPAe pangnu khato chempangle changpuix ija ngünle; keme omüi wüi moklax oma wüi moklax, chixe kem to hule ngole.

⁴Chingcha zangwüne khüzün apüile, ikoxle mongtsik zangwüne nang chasa thule akhünle.

⁵Nuzün-pazün te angkya nang zongto ongat changle; hwome achangle fakya kax ma laxkya a jetüi-hwonlangkya changpu.

⁶Otsao khünakbue hwom tuina thomle, ikoxle chichang-chizangkya khünakbue thangnak pongma ija asamle.

⁷Tsingwankya a jetüi-hwonlangkya khünakbue apuk wüi, ongatbue münchang.

⁸Müikya khünakbue zangjop pongma JOWANPA ang mongmüile, ikoxle chichang-chizangkya khünakbue chix hato tö apüikyabu thua chix anule.

⁹Chichangchizangkya khünakbu lomtang thua JOWANPA anule, ikoxle sukya mwot mokkyabu to chixe mongkünle.

¹⁰Nange chem thaipuix ija jangmok thüiningle, nang a huanuma sikngün ang tomüi; nang alüile achangle zingle chihüi thüiningle nang ziüi.

¹¹Ikhato chem tüipuix ija JOWANPA ang awan ang chitomle amalume ngaxchu pyenle thom ang müntho; jangchang thüiba keme kem tutex chix thoto chemle khomle thom ang thoüi?

¹²Kax ma chilaxle tüikya khünake chix to achangle fakya laxse müntsu; je-hwon tüikyabu ma hwome otuechu tsaitik-kaxshole münchang.

¹³Mongmüi pongma khünakbu nyile, ikoxle chemtue hwom mongmale changpuix, hwom ang mongthangle.

¹⁴Jetüi-hwonlangkya khünakbue tsing-wanle kopse tsule, ikoxle ongatbu a hwome chemchu chitsingle changkya füi mongzom müile.

¹⁵Mixshix-zasa khüzün tuita a tamchu chizakle azankya zanhok changpu, ikoxlechu mongmüi khünakbu ang ma tsün füi mongmüikya tüile.

¹⁶Ahak-alua laxle thangnak ma ngokya füi JOWANPA thuazale zasa ang ngokya wüi sümüi.

¹⁷Miktsak-mongngwom khato müi-hi-nyax saxkya füi nang to mongkünkya khünakbu füi suihing-laihing saxkya wüi sümüi.

¹⁸Mongtsik khangpong ma laxlaxle ngokyabue tsaitsat-kaxtsa angkya alaile, ikoxle adukyae mongsom apüile.

¹⁹Nang zaxkak-mongdomle jangchang, pangnu chito nang füi tingtuitui wüi apongüi, ikoxlechu nang ma tsaitsing-kaxtsing jangtüi, nang ma otuechu tingtui müntüiüi.

²⁰Je-hi-hwon füikya naosome mapa mong amüile. Ongatbue tix wüi manu thajao ang tomle.

²¹Angabu a hwom ongat-ongui füi mongmüile, ikoxle jetüi-hwonlangkyabue chem supuix ijatix mokle.

²²Tsuakkya tukuxle nange tsaitik-kaxshole laxkox, jangchangba nang tholünkya ngünüi; ija chichang thüiningle nange thokya-lünkya müntüiüi.

²³Otu ma asukhakkya tsaihuak-kaxhuak atakkya a chemtukuxkya mongmüi changpuix!

²⁴Jetüi-hwonlangkya khünakbu a ma khüzün thakchi to alyet angkya lomtang ma ahamle, zikmüt-mangkho hato athai angkya lomnu ma münchang.

²⁵JOWANPA e künngam-mongngam füikya khünak homkha tupang pünüi, ikoxlechu zomnu tuita tuina kho chixe awale kopüi.

²⁶JOWANPA a ochax tutex thua anule, ikoxle zuikop zangwün füi chix ang mongmüile.

²⁷Mix to dyen-lale olüi kop ang azonglax, nang homkhae thama apongüihex. Zuizunbu laxle chichang thüiningle nang tsünlo zaknuile ngoüi.

²⁸Müikya khünakbue kaxlan faüi thoto ajangle kople. Ochax khünakbue lebama lanle alyetüi, ikhoma thama füi apong ang kople.

²⁹Müikya khünakbue zangjop pongma JOWANPA e nathale, ikoxle ochax khünakbu to chixe nathakya müntüi.

³⁰Nyit-tunzae nang ang mong amüile, ilaxle müikya kaxhoe mongthang amüile.

³¹Nang to achangle fa pongma nange apale jangchang, nang a jetüi-hwonlangkya mix changpu.

³²Nange tsing-wanle münlaxpule angamle jangchang, nange nang to alüile mak-kha ngopu. Achangle fakya nange pongle jangkop, nang a jepa tuita ang achangpu.

³³JOWANPA chathua zakya, ija a laitik-ngakmankya ang achangpu. Nange tütali münchong kopüi thoto nang ma pui-naikya tüikop angkya changpu.