Read Wancho Naga Wanwünkax 18 Bible Online

Wanwünkax 18 - Wancho Naga bible

Wanwünkax 18

¹Mix füi tomsax-tommokle chichangkya khünakbu a ma hanpak zaza ma mongtsukyabu changpu; noknusae changle le tiklax ngokya füi ngaxchu hwom apüi lüwüi bangüi.

²Ongat khünak tuitae, ija oli mae tik laxle ching-ngopuixle ajang ano angkya ojao müntüi; chix mongto thütkya a, chixe chem awanpuix ija aho angkya, ibibi wüi.

³Ochax hia thünzak a tom-tomle le. Nange ma achuak-achenkya amütlax, ilaxle ija lüi ma nange thajao-wünhai kopüi.

⁴Khünak tuita zangwün a, molo-tinu ningle zule, shuasa tijen ningle tsaothale, tuita jetong-hwontong angchu achang tsuak.

⁵Chemchu chitikkya khünak ang sukya kaxfün chifa homtoxle thaikya chima se angkya a sukya olom münchang.

⁶Chemtue ongat khünak tuitae kax ma alat ang sütpuix, ija chixe ma to chakmok-hüile lompu.

⁷Chemtue ongat khünak tuitae zangwünpuix, chixe ma hato thama sekya changpu; chix tsaifa-kaxfafa mawüi chix manle.

⁸Zaman zangwün a huanuma tile: ija jok angkya to keme chemtukuxle mongkünpuix!

⁹Zaxkak-mongdomkya khünak a tuita thama adün angkya khünak füi tomwüi oma changpu.

¹⁰Ojong khato paolaxle otsao khünakbue khosün atakpuix, JOWANPA a ija shingmongkya long-katuk tuita ningle changpu.

¹¹Ikoxlechu, tingnu akhople zaile tüikya shingmongkya long katuk ningle, ma tuina füi hwom a kho-awale ding to nwonle thom ang kopüile ahak-aluakyabue thütle.

¹²Puinaile machang tanto owa tochu achuak-achenle münchang; mongngam füikya khünakbu a omüt lom to tüile.

¹³Nange kaxlan faüi thoto ajangle koplax. Ile chichang thüiningle nang a ongat tamchu mixtha ajaokya tuita ang changpu.

¹⁴Nang kak-lakle changpongma ozün ma ngose tsukya nang mongjange nang zaksyetle thom ang tomkoxlax, ikoxle nange ija amütle jangchang, nang oshuk monghom maxkya ang changpu.

¹⁵Jetüi-hwonlangkya khünakbu a jento awanle kopsele tsukya hia achwonkya mong füi ngole.

¹⁶Nange laxli khünak füi apongse tsuchami? Hingho-chaktwon füi nguilax jangchangba ochwon ma apong ang thoüi.

¹⁷Khwalo ma pongwang ole zangwünkya khünak a, chix zanpa-e chix ma kaxtikle machang tanto chix wüi abakle sukya ningle changle.

¹⁸Khwalo ma zongpan ma alakya nyi ba angkya zangwün a chizing tswonkya makhange ashuk ang tsuak.

¹⁹Ma haxnu-homsabu to asunkya tüikox, shingmongkya long katuke tingnu tuita kho-awa thomkya ningle hwome nang kho-awa thom angkya changle. Ikoxle nange hwom to ahele jangchang, hwome nang ang kadaple münfaüi.

²⁰Nange zang chemle wünpuix ibu füitix nang ozün ma ngo angkya changle.

²¹Oja zang nange wündao laxpuix ijae nang khosün ang tsuak chichangba khohang ang tsuak; idaile nang zangwün khoma chem apongpuix ibu nange pongle lax angkya wüi changle.

²²Kakonu atatkya a nange müikya oli atakpu; ijae JOWANPA a nang zongto müikya ahopu.

²³Chemtue mixshix-zasabue zangwünpuix, hwom puinaile chang angkya wüi, ikoxle chemtue hakpa-luapabue kaxlan faüipuix, hwome kaxza zongle lanle.

²⁴Züizüi zuikhui ashemkya otsün münlo, ikoxlechu zuikhui züizüi a pa-sa tüinao füi ngaxchu sümüi.