Read Wancho Naga Wanwünkax 2 Bible Online

Wanwünkax 2 - Wancho Naga bible

Wanwünkax 2

¹Ku sa, kue nang ang anwot-anokya awanle koplax üntoxle kue nang ang chem moklax thüipuix ija taxalak.

²Oja je-hwon changpuix ija to apa koplax ilaxle ija tsingle lax ang azonglax.

³Changle, awan-atsingkya julax; mongje tüi angkya bama tsaiju-kaxjulax.

⁴Nange chemtukux azongle hun-khop chichangba pyenle thomkya tuina lomle changpuix itukux khütkhile je-hwon lomkox.

⁵Nange ile jangmok thüiba, JOWANPA thua zapu tamchu Zang tsing-wanpule chem ang nyakpuix ija awanle laxüi.

⁶Je-hwon koxkya a JOWANPA tix changle; tsing-wankya hia man-ngünkya chix makhange tix hüile.

⁷Otsao ma hia sule tüikyabu to chixe fongle tamchu chixe hwom kho-awale.

⁸Mix to tawüi le hukya khünakbu kho chixe sünle, üntoxle chix o künkox-mongkoxle tüikyabu chixe nyele.

⁹Nange ku kax apale jangchang thüiningle, chem changpuix, supuix, tamchu masüi-mixlüile chichangpuix ija nange awan ang kopüi. Nange chem moksehex ija nange awan ang kopüi.

¹⁰Nang a jepa ang achangüi ilaxle nang je-hwone nang ang mongmüi faüi.

¹¹Nang mongje hia awan-atsingkyae nang khosele changüi

¹²ilaxle thaikya mwot mok ang chitomle nang awa thomüi. Ibue ile zangwünkya khünakbu füi nang atsaile ngo ang tomüi:

¹³ochax zangnak fangto ngo angkya hanpakma opange otsao tsün danle toxpuix,

¹⁴opange thaikya mwot mokkya ma pwonladongle changpuix ilaxle owae zakmax-thünba mwot ma mongmüi atakpuix,

¹⁵tüipule mongong angkya chitüikya khünakbu.

¹⁶Tunmüi zangwün makhange nang jikle lax ang azongkya chichang-chizangkya mixchae tsiakya chak to chidütle nange adu ang thoüi;

¹⁷ija mixcha a ma kakopa to mongong chitükya tamchu chix füikya otsao kaxfün alakle asamdaokya mixcha changpu.

¹⁸Nang she homlom chito paole jangchang thüiningle ziklom tole lengokya ang changpu. Ikhato paokya a ama-lum pandongkya ang changpu.

¹⁹Opange she waile changdaolaxpuix owachu chatle chichat. Chix a khüzün lom to chatle tamchichat.

²⁰Idaile nange chuwüi müikya khünakbu man tolaxle tsaokya tsün ngo angkya changle.

²¹Otsao khünakbu: thaithaxkya chitüile ngokya khünakbu: hwom a kem chaxwan ma ngo ang kopüi.

²²Ikoxle chichang-chizangkya khünakbu a Zang-e ija chaxwan tok angkya tswonle paoüi ilaxle ochax khünakbu a haxtok angkya pün fipupule file awütüi.