Read Wancho Naga Wanwünkax 25 Bible Online

Wanwünkax 25 - Wancho Naga bible

Wanwünkax 25

¹Ikhama anaole chuwüi Solomon wanwün-kaxbu changpu. Ibu a Judah nok wanghom Hezekiah khwa angkya zatmixbue zale thomkya changle.

²Zang-e chem pyenle thompuix ija bama kwome chix achuakpu; ibu taile apua fakya hanpakma kwome wanghombu achuakpu.

³Wanghompa-e chem ajang ngopuix, nange otuechu münawan; zangding tsuakkya ningle tamchu tinu zukya ningle, chix tutexbu a kem füi atsaile ochu towüi.

⁴Khop angkya chitsaokyabu achukle awütlax ifüima zingpabue ija makhange osün müikya jali zingle alaiüi.

⁵Chichangchizangkya lom to zünsaile changkya kax wanghompa füi atsaile thomkox jangchangba chix wangting a sukya olom ma mokkya mwot khoma zangle wünüi.

⁶Nang chemtue wanghom tunthoma ajongpuix, chixe nang ang tuita alixachong changpule thütlaxle nang to mongkoxle naxchangle taxazong.

⁷Alixachong tunthoma fangto athaile changkya füi: “Ikhato donghüi”, le sele dünkya wüi sümüi.

⁸Nang mike ngünle laxkya tütali bama khwa to pao ang taxmom. Nang füi angkya owawa mikngün-kaxngai-e nang kax thaikya ang jangachang thüiba chemle changüi?

⁹Nang tomzi füi kax ma alankya jangtüi, ija hünkhi bama huxsa ma wünle tsuaklax, chingai fang bakle ngaile taxchang.

¹⁰Chichangthüiba nange huxsa zangwün kople thom ang müntho changale noknusae awan ang kopüi, ilaxle nang zakkop a tambaktoxüi münchang.

¹¹Müile wünle angai ang tsuakkya tutex a khop to hun füi osün amüile zingkya ningle changüi.

¹²Apasele tsukya khünak hama apongle hüidaokya khünak tuitae khünzai angkya kax koxkya a müikya hun füi zingkya khoptüt hia likwünbu füi ngaxchu sümüi.

¹³Tsaxtu tue zangmuk-zangkhamle changpongma tikong ling ang kopkya ningle, mongao angkya chitüikya kaxhomix a kaxhole apaokya mix zongto tuita khangkho achale fakya ang changpu.

¹⁴Chikox angkya khato koxüihex-ole tsaosaxkya khünak a tuita zangngax chiawat angkya to atyenkya zangfwom hia awinkya zangwin ningle changpu.

¹⁵Adukya füi mong chingwomle zangwünkyae tuita wanghompa ngaxchu anom-anai ang tsuak, ilaxle tunmüi zangwün füi longtom ashix ang tsuak.

¹⁶Othüt ziakaile nange nax-ti taxsaxkop; alüile saxkyae nang fat ang tomüi.

¹⁷Tomzi homkha to othuithuima nople le taxngo; hwome nang to mongngwom kopüi ilaxle miktsakle shuüi.

¹⁸Chichangkya to kaxhux fekya a tuita mik amüt angkya hanpakma twonkya changlo, pünthom hia sanhap thatha changpu.

¹⁹Khosam pongma mongong angkya chitüikya khünak tuita to chalomkya a aloxünkya wa füi shaokya hia faikya cha füi ahamle ngokya thatha changpu.

²⁰Mongmale ngokya khünak hato tsai ngaokya a tuita zangkong khato nyi sikle koxkya hia makthün ma hum füi fukya ningle changpu.

²¹Nang zanpabu ang wokno-tilanle jangchang, hwom ang asüt-alingle changkox.

²²Ile changkyae nange hwom mongkha to thünzak kopkya wünchua ang tompu, ilaxle ija khoma JOWANPAe nang to mohimanüi.

²³Shuakuxchi zangwine ojao chithaile zangwat ang tomkya ningle za-amankyae mongtsik-mongma alaile.

²⁴Zaman mixcha füi tomle homkha ma ngokya füi homtok to ngokya wüi sümüi.

²⁵Oshukshukma tsailo tokhange müikya kaxho atat ang kopkya a tuita dingdua zuale tilan ngopongma tikongsa lingkya ningle changpu.

²⁶Müikya khünak tuitae chichang-chizangkya khünak ngui ang tomkya a tuita nang ang chitsaokya shuajen hia hing shodaokya tüküi texle atak ang tomkya changpu.

²⁷Naxti angangle saxkya nang zongto chemle oma ang changpuix, ija ningle achuak-achenkya lomkya chuwüi oma changpu.

²⁸Nange nang mongtsik adu ang chitho thüiningle, nang a, pan ma zün chidao homtoxle kothofa to ngokya chingcha ashukkya tingnu tuita ningle changpu.