Read Wancho Naga Wanwünkax 27 Bible Online

Wanwünkax 27 - Wancho Naga bible

Wanwünkax 27

¹Ngainyixkya hanpakma otuechu tsaichong-kaxbongle taxchangkop. Ngainyixkya sedüne chem apüiüihex nange müntik.

²Mix khünake: mixhing wünpabue to lünle nang achuakle naxchang; otuechu ma alüile achuakle taxchang.

³Sak hia long füi ngaxchu ongate apüikya tingtui wüi sülix.

⁴Mongtsik a mong shix-makya tamchu thama adünkya changpu, ikoxlechu osing-nüfux zongto ija chemchu münchang.

⁵Owawae, nange chix tui ojao müntex le thüt ang tomkya füi, chix to ngaithole zünsaikya wüi sümüi.

⁶Chixe nang mong amale changkoxchu zuikhui bama chem oma münchang. Ikoxle zanpa owawae nang to chix chak füi künle changkoxchu: mik-hingle hu angkya oli changpu.

⁷Nang wokfwot-tilan müile tüipongma nax-ti ngaxchu münsax thüiüi, ikoxle chemtue nang woknuak maxle changpuix, khaxlakkya oli ngaxchu tijongle ataküi.

⁸Owawa hom füi atsaile ngokya a osa tuita ozop füi atsaile ngokya ningle changpu.

⁹Ongan müikya müngae pa pongma nang ang mongmüile, ikoxle tingtuie nang mongsom sam ang tomle.

¹⁰Nang zuikhuibu hia mapa zuikhuibu alakle taxchang. Nang tingtui dongle changpongma, haxnu-homsabu ang asunhüile taxthüi; tsailo tokya haxnu-homsabu füi onui ma tüikya tomzipae wüi sümüile nang to fong ang tsuak.

¹¹Jetüi-hwonlangle tüilax, ku sa, ikoxtix ku ang mongmüiüi; ku tha ajaole changkyabu pangnusa to kaxlan ku ma bangüi.

¹²Khangka-hingkya khünakbue tingtui hüiüi ngünle laxüi ilaxle ija tsiakle toxüi, ikoxle mongjang chitüikya khünak küithole ikhato nguile koxüi ilaxle ofüima mongmale ngoüi.

¹³Khünak owae wünpa tuita thashe thom angkya tsaosaxle changlaxpuix ija tsangthom ang chix tuina amüt angkya olomjao changle.

¹⁴Nange swomsae jip azwotkya ma fele, akhongle nyakle, ma zuikhuibu to thuakzomle chang ang tsuak.

¹⁵Kakonu za-amankya mixcha a tuita homkha ma zangwat tue watti dongkya ningle changpu.

¹⁶Nange she chemle adangle thomüi? Nange zangwin abax ang azongdaopia chichangba chak-khui ma awangle münga puixle kop ang azongdaopia?

¹⁷Jan füi jan junkya ningle, khünake khünak makhange awanle laxle.

¹⁸Fupsa pün apu-changlax jangchangba fupsa ziak sax ang ataküihex. Ma hopupa apu-changle tüikya dapa a achuak angkya oli.

¹⁹Ti kha to nange ngünkya chaxba a nang chaxba changpu ilaxle nange nang mong khato ngün ang kopkya a nang changpu.

²⁰Khünak küntex-mongsung a amalum ningle: othuithuima onui tüile wüi ngo angkya changle.

²¹Hun hia khop ang wün ma wanle anole; khünak-mixsa kün-mong thwonlop angchu wanle ano ang tsuak.

²²Mongkho chinguikyabu to nange zithole fitkoxchu, hwom angkya künngat-mongngui nange fitle apao ang müntho.

²³Nang chun hia maihubu to tsuakkya tukuxle müile hukox,

²⁴chemthüikoxle tuina a othuithuima ngo angkya oli münchang. Onok-chaxwan ngaxchu tamchimaxle ngo ang müntho.

²⁵Nange tsaxkua zütlax ilaxle anaokya tsaxkua nyemle ngopongma nange haxhua chito hingzang zütlax.

²⁶Nange nang chun makhange nang nyiwun zing ang tsuak ilaxle nang zwonbu hangkya ma kopkya ngun füi haxtok shak ang tsuak.

²⁷Atale tüikya zwonbue nang üntoxle nang homkha ang tsomti koxüi, ilaxle nang da hwom kakonubu hanpakma ang chuwüi koxtsuak.