Read Wancho Naga Wanwünkax 28 Bible Online

Wanwünkax 28 - Wancho Naga bible

Wanwünkax 28

¹Hwom to owaechu chiachua pongma chichang-chizangkya khünakbu pao ma sütle, ikoxle sukya khünak a mailang ningle mongchongle.

²Chemtue jat-li tuitae ochax lyenpuix, ija apün-ada angkya mix tsüilüile müntüiüi. Ikoxle jat-li tuita a jetüi-hwonlangkya tamchu mik-hingkya lompabu tüikya zumatix tsak-zong füi tamchu okuilole ngoüi.

³Apün-adakya khünak owawae tuimix-nuakmixbu to thuthusyeple changkya a saxziak thuple amakya zangwat jwonle ngokya ningle changpu.

⁴Nange wanlom to e-sekya ojao chitüi thüiningle, nang a chichang-chizangkya chima sekya ang changpu; ikoxle nange wanlom ibu kax ma laxle jangtüi thüiba, nang a hwom füi opüi ma ngokya mix changpu.

⁵Ochax khünake sukya chem hex ija müntik, ikoxle opange JOWANPA to shwompuix hwome tix müile tsingle laxle.

⁶Ahak-alua üntoxle chisule tüikya füi tuimix-nuakmix ang ngolaxle sule tüikya wüi sümüi.

⁷Wanlom kax ma laxle tüikya tsünzün thom a jetüi-hwonlangkyabu changpu. Tütama lax ang chimüikyabu füi zuikhui zingkya a honu-hopa hwom hanpakma zakkop changpu.

⁸Koxkya honu bomachu sasün laxkya hia mix shoma ma shomüi ang laxlaxle, ija füi ahak-aluale jangtüi, nang tuina a, mixshix-zasa to chingcha tüikya khünak owawa chak to dong dao angkya changle.

⁹Nange wanlom kax ma laxle chitüi thüiningle, Zang zongto nang zangjop ang nushix dongkya tuita ang changüi.

¹⁰Müikya khünak tuita owawa ochax lom to alyet ang nange tsünle jangchang, nang a ija nang tsün ma manüi. Chemchu chitikkya khünak to a mohimanüi.

¹¹Hakpa-luapabue jento hwom a jetüi-hwonlangkyabu ningle thütle, ikoxle tuimix-nuakmix owa ma mongtex zule tüipuix, chixe wüi sümüile tsing.

¹²Chemtue khünak mixmüi tuitae apün-awang angkya chifün atakpuix, noknusa ang mongmüi, ikoxle chimüikya khünake chemtue apün-awangle changpuix, khünaknu a azwonle ngole.

¹³Nange ma ochaxbu pyenle jangthom, nange tsün ma tho-lünkya münngüntoxüi.

¹⁴Othuithuima JOWANPA kax ma laxlax ikoxle nang mongmüile ngoüi. Ikoxle nang a nakhwop chikexkya mix jangchang, nange thama apongüi.

¹⁵Chichangchizangkya wanghompa tunthoma mixshix-zasabu a chifün chitüi; chix a mix to shingle hüikya chaxnu hia chepnu füi ngaxchu süshixkya changle.

¹⁶Tutex omüi chitüikya pünpa-chongwang a tüle shix-makya lompa tuita ang changüi. Sukya to chikünkya mixe okuilole apünüi.

¹⁷Owawa mix mik amüt ang thaikya khünak a tsuakkya tukuxle momle ma zuk-kha thole ngokya mix changpu. Chix to abax ang taxazong.

¹⁸Chem supuix ijama ngolax jangchang nang to chem münthüi. Nang sukya olom ma chingo, nang allele dütüi.

¹⁹Azongle mokkya manzai mix ang süt okhonguile tüiüi. Hanpak ngatto alyetle ngokya khünakbu othuithuima chitüi-chinangle ngoüi.

²⁰Sukya lom ma ngokya khünakbu okhonguikya tsün tamchu mongmüi ma ngoüi. Ikoxlechu nang ahak-alua ang akhangle jangchang, nange sikngün apong angkya changle.

²¹Masüi-mixlüikya a münsu. Ikoxle züizüi kaxfün mixbue hidaoküsa zuizun kop ang ngaxchu thaile mokle.

²²Nüfux füikya khünakbu a ahak-alua ang müimamale akhangle, otui-onuake hwom to chemtue hongkhup ma hongüihex hwome müntik.

²³Owawa achangle laxkox, künkux-mongkwom füi achuakkya to kaile ofüima chixe ija a müipule thüiüi.

²⁴Manu-mapa angkya ahuxkya chem münchangle thütkya khünak a zangjang huxmix füi sümüikya le münchang.

²⁵Nüfuxe tingtui adünüi wüi. JOWANPA to mongong thomkya wüi nang zongto amüikya.

²⁶Ma tutex füito azuikya mix a anga. Jetüi-hwonlangkyabu hwon-nwot füito azuilax, ikoxle nang azangüi.

²⁷Chitüi-chinang khünak ang laxkox, jangchangba nange chemtuechu nuaklom-khüntho le müntüi. Nange chitüi-chinang khünak zongto nang mik achikle jangchang, nang to thuakzom angkya mix huanuma tüiüi.

²⁸Chemtue chichang-chizangkya khünake apün-adale changüihex khünaknu azwonle ngole. Ikoxle ibu hwom tüntong angkya thaikya füima tamchatle otsao khünakbue apünüi.