Read Wancho Naga Wanwünkax 29 Bible Online

Wanwünkax 29 - Wancho Naga bible

Wanwünkax 29

¹Nang achangle fakya foto nang sisile mongtsakle jangchang, nyixta nang thule asumüi ifüima amikya hato tamchichat toxüi.

²Ku hama otsao pünpa-chongwang ahohüi jangchangba kue nang hama mongmüi khünakbu ahoüi.

³Nange je-hwon to achuakle jangchang, hünnu-hünpa hwom ang nang bama ngadongüi. Tsangtsa hangkya mixcha hwom ang koxle ngun ashix-akhaxkya a ongat ngun chiak changpu.

⁴Chemtue wanghome sukya kaxfün to mongkoxle changpuix, tingsho-haxkha tsak-zongle changüi, ikoxle chixe ngünkya zaza mo wünle jangchang, chixe chix ting chix nok chiakle amütüi.

⁵Künkux-mongkwom füi nange ma zuikhui achuakle jangchang, nang a alüile ma kam thakya mix changpu.

⁶Ochax khünakbu a hwom ochaxbu ma alüile manle, ikoxle sukya khünakbu a mongmüi ma tokdomdale.

⁷Müikya khünak tuitae chitüi-chinang khünak süntswon awanle, ikoxle chichang-chizangkya khünake ibu münawan.

⁸Mix to chi-e chi-sele tüikya khünakbue tingnu komkaile khosam ma thom ang tsuak. Jetüi-hwonlangkya khünake jali adangle thomle.

⁹Chemtue jetüi-hwonlangkya khünake ongat khünak tuita zongto müikya wanlom tuita apüile changpuix, ija angapa a nyilan nyiüi ilaxle ija a noke atatle tuita wünhai ang achangüi.

¹⁰Aji hanpakma tilanle ngokya khünakbue sukya mix to miktsakle, ikoxle otsao khünakbue ija ningkya khünak kho-awale

¹¹Ongat khünakbue hwom mongtsik angaithole ahole, ikoxle mongtex füikya khünakbue adule tamchu ija mong ma kople thomle.

¹²Apün-awangkya khünak tuitae kaxthai zangwün to mongkoxle jangchang, chix nguakax wangkhobu a othaibu ang changüi.

¹³Chitüi-chinang khünak hia chix to afangle thomkya nyie ija tomkux ang laxle:JOWANPAe hokhi pangnyi ang wüi mikbu koxle.

¹⁴Wanghom tuitae chitüi-chinang hwom süntswon kopsele jangchang, chixe okuilole apünüi.

¹⁵Achangle fakya hia zünkya a naosombu hanpakma amüikya. Hwom ma mongtextex lom tole ang jangthüi: ibue hwom khokho ma manu hwom ang thünzak koxüi.

¹⁶Chemtue ochax khünakbu apün-awangle tüiüihex, mik maxkya onui changüi. Ikoxle otsao khünakbu a ibu thomle dütkya ngün ang ozün ma ngoüi.

¹⁷Nang naosombu zünkox jangchangba hwom bama nang ang jento ngadongle ngoüi. Hwome chemtuechu nang ang thünzak münfa.

¹⁸Zang-e lom azuikya chitüikya jat-li a tüta mwottho sütlom textyakya chemchu chitüikya nok changpu. Mongmüi a Zang wanlom thomkyabu changpu!

¹⁹Hwom füi zangwünkya tata makhange nange dabu achangle zing ang müntsuak. Hwome nang tutex awan kox, ikoxlechu hwome nang to ojao mong münkoxüi.

²⁰Ongat to zangwünkya khünak füi anga hanpakma wüi monghom angkya sütüile.

²¹Nange nang dabu ang, hwom naosom pong tokhange hwome laxse atsutsu komle koxle jangchang, nyixnyixta hwome nang ma tüikya pangwüi pale laxüi.

²²Mongtsik khangpong ma laxlaxle ngokyabue atsi-ala angkya hia tingtui huanuma adünle.

²³Ma kax ma chilaxlaxba le thütkyae nang thomle adütüi, ikoxle nang a puinaile jangtüi, nang chathua zaüi.

²⁴Ahuxmix zongto zan amakya a chix üitho changpu. Khwalo ma kaxtsing zangwünle jangchang chix ang sikangünüi, ilaxle kaxtsing zang chiwünle jangchang Zang-e chix to thuakzomüi.

²⁵Mixe nang bama chemle ajang üntongsi le ija bama süchongle khütkhi ngokya a tuita thomzün changpu, ikoxle nang JOWANPA to mongongle jangchang, nang to chem münthüi.

²⁶Apün-adakya mix füi müisele noknusae texpu, ikoxlechu nange sukya kaxfün a JOWANPA tokhange tix kop ang tsuaküi.

²⁷Otsaobue chitsaokya thua anule, ija ningle chitsaokyabue chu otsao to anule.