Read Wancho Naga Wanwünkax 30 Bible Online

Wanwünkax 30 - Wancho Naga bible

Wanwünkax 30

¹Ibu a tsaothale Jakeh sasün Agur kax changle: “Zang a ku füi müntüi, Zang a ku füi müntüi, ilaxle ku a juafong angkya owa chitüikya mix.

²Kue khünak füi müi wüi ale le tüile; Khünak kem ma tüise tutex ku ma müntüi.

³Kue chemtuechu je-hi-hwon awanle münkop, ilaxle kue Zang bama chemchu müntik.

⁴Tütuechu zangkangting je-hwon bama komkaile awankya mix tüicha? Tütuechu owawae hwom chak ma zangwin kop ang thokya mix tüicha? chichangba nyitsyensa ma ti akütle kopkya mix tüicha? chichangba chaxwan longzibu ziazütle tsuakkya mix tüicha? Hünzome jangawan, ibu a opang? Hwomsu-hwomsabu a opang?

⁵“Zang-e chix kaxtsao pangwüi thomle. Ma khangkhom nui lomle chix hato hüikyabu hanpakma chix a nyadi jaojao.

⁶Chixe chiakaxkya to nange akaxdaoale thüi angkya jangtüi, chixe nang to saüi ilaxle nang a atsepule ahoüi.”

⁷Kue nang ma tikpu, Zang, ku ziüi thoma ku ang oli anyi koxhüi:

⁸Ku atse ang taxtom, ilaxle ku a hakpa angchu chichangba maxpa angchu taxachang. Idaile ku ang kue chemtukux saxse hex itukux wüi koxhüi.

⁹Ku ma alüile jangtüi thüiningchu, owatsing, kue nang chem ma lax angle thüiüi. Ikoxle ku mütmix ang jangchangchu, kue ahuxüi ilaxle nang mün amaüi.

¹⁰Nange dabu chimüikya mo hopupa hama taxwün. Ija bama nange othuak-ozom hia sikngün apong lang a.

¹¹Hopa hwom to thuakzomle changkya hia honu hwom achuakle chichangkya khünakbu tüile.

¹²Ojao chitsao khato züizüi khünake hwom tsaole le thütngokyabu tüile.

¹³Züizüi khünake hwome tüle müile: oh chemkuxma müitsuak puix, le thütle ngokyabu tüile!

¹⁴Mixshix-zasa hia chitüi-chinangkya zongzong ma laxle adakyabu tüihule; ija a hwom zongto ma wok lomkya ang changpu.

¹⁵Wütnu tuita ma sacha anyi tüikya, ilaxle hokhi pangnyi ang “Ku ang Laxhüi!”, le amün. Tütuechu mongzom chimüitoxkya oli ali tüile:

¹⁶Ama-lumting, naosom chitüikya shekonu, ti lomle tüikya haxzan, ilaxle abax ang chithole chuale lekya wünchua.

¹⁷Nange hünpa chanyi chichangba azu füima manu ajao-adale jangchang,, nang a okun-olae saxdao angkya changle chichangba okhabue nang mik lokdao angkya changle.

¹⁸Chemle thopuix le ku zongto khosam ali tüile:

¹⁹zangkho to ola pikya, longtok to pu ahamkya tinu mongto khua olom ataktsuakkya, sheko hia lükya mong ma akünkya.

²⁰Mongong chalom chitüikya kakonu tuitae ile mokle: she mix füi ngangüi, tijo, ilaxle thüi: “Kue thaikya chemchu münmok!”

²¹Chaxwannu, chix jaoe adu ang chithokya olom ali tüikya:

²²da tuita wanghom ang achangkya mix, ongat khünak tuita ma chixe sax ang okhonguile tüikya,

²³nushixdongkya mixcha mix ma anokkya, ilaxle ma hopupa kakonu dyetle apaokya danucha tuita.

²⁴Chaxwan tok ma muaküsa zünmok ali tüile, ikoxlechu hwom ma tsingtsang tüle-tüle tüile:

²⁵Tsükhi-tsiksa: hwom ma zong müntüi, ikoxlechu hwome tsonu ma sax ang süt athün tsuakle.

²⁶Zünmokbu: hwom ma tsak-zong chitüikoxlechu longkha to homzai laxle ngole.

²⁷Zazwop-kuknu: hwom ang wanghom müntüi, ikoxlechu hwom ozyem ma ahamle.

²⁸Manplokbu: hünzome ija tuita nang chak ma kop ang tsuak, ikoxlechu nange ibu chongwang homlobu to ataküi.

²⁹Hwom aham pongma hubatsutsukya ali tüile:

³⁰mailang, müi nüjen khama akhole tsakkya ilaxle chemthua chu chizakya.

³¹Zwon, ohatpong, ilaxle khünaknu tunthoma wanghompa,

³²Nang kax ma chilaxlaxba le ngamle jangchang ilaxle chichang-chizangkya mwottho zingle jangchang, mong ma ajangkya zakün!

³³Nange tsomti jangfyet, nange tsomti zao kopüi. Nange owawa nakua to thule jang kox, ija ajiüi. Nange mongtsik alaile jangchang, nang sikngün khato noppu.