Read Wancho Naga Wanwünkax 31 Bible Online

Wanwünkax 31 - Wancho Naga bible

Wanwünkax 31

¹Wanghompa Lemuel honue chix füi akaxkya zünkax-saikaxbu a ibu changle:

²“Nang a ku zangjop to lankya, mongkün ku sasün changpu. Kue nang hama chem akaxüi?

³Nange nang janzüi atu-amaikya ma taxashix ilaxle nang ngun-syen pangwüi sheko hanpakma taxashix; ibue wanghombu amütdaoa.

⁴Lemuel, apalax, wanghombue junu hia jukhi chemchu chilingüi.

⁵Chemtue hwome ija lingpuix, hwome wanlombu alakle asamle ilaxle süntswon kopse khünakbu wün ahaile.

⁶Jukhi a sikngün mongthang ma mongmaxle zingokyabu hanpak changle.

⁷Hwome ija linglaxle ma tui-nuak hia mongma alakle naxasamkox.

⁸“Ma mo wün ang chithokya khünakbu mo wünle laxkox. Asun angkya mix chitüikyabu pangnu ang hwom süntswon chiamüt angkya bama asunle fakox.

⁹Ibu hanpakma wünle laxkox ilaxle sukya kaxfünpa ang changlax. Mixshix hia zasabu süntswon amüt ang taxtom.”

¹⁰Mwt-tsuakkya kakonu atak ang chemtukux tsakpuix! Iningkya mixcha a thalix likwün füi ngaxchu achongkya changpu!

¹¹She kakopae she to ma mongong thomüi, ilaxle chix chemtuechu tui-nole chitüiüi.

¹²She ozün ma ngokya kople, she-e chix zongto müikyakya wüi mok ilaxle chix zongto maküli chemchu chimok.

¹³Mu-nyi hia jak-nyi zing ang she jento chakchak chingaile mok.

¹⁴Tinu khatokya khuae apüikya ningle she-e tsailo fao tokya hom to süt apüi.

¹⁵Kako hanpakma fongmok-tiktale tamchu dabu ang mwot ahole fa angkya hanpakma she a zangngai thoto wüi zole.

¹⁶She-e haxtok to hulaxle ija shak, ilaxle she-e kopkya ngun füi grep haxtok manzai.

¹⁷She a tsak-zong füikya hia mwotjat le tüikya azongle mokkya mixcha changpu.

¹⁸She-e mokkya mwot otha pangwüi she-e awanle, ilaxle awünningle apüile mwot mokle.

¹⁹Mae lax ang zichu she-e fyakle ilaxle nyichu she-e takle.

²⁰Mixshix hia zasabu zongto she chaktom dale tüile.

²¹Jun dütüi thuachu she zale münngo, chemthüikoxle hwom kako ang lomkya nyibu tüile.

²²She-e lya nomle ilaxle ibu to nyimüibu füi chwople.

²³She kakopa a noknue awanle, ting-nok khama tuita lompa.

²⁴She-e nyitak tamchu züpakbu zing, ilaxle ibu thalex mixbu ang hangle.

²⁵She ma zong tüile ilaxle noke esele tüile tamchu füichi hanpak thua zale münngo.

²⁶She-e somdangle jekax-hwonkaxkax wüi akaxle.

²⁷Homkha süt-mwot to humele chang angkya hanpakma she ang chak ojao chingaile mokle.

²⁸Naosombue she hato hwom mongmüi ngaile ilaxle kakopae she achuak-achenle.

²⁹Chixe thüi: “Shekobu müikya kakonubu tüihule, ikoxle hwom pangnu khama nang wüi sümüikya changle.”

³⁰Jik-naikya a odyen changpu ilaxle sünmüi samdao angkya, ikoxle JOWANPA achuak-achenle tüikya mixcha a achuak angkya wüi.

³¹She mwot pangnu bama she ang münchong fakox. She a noknusae ese ang asupu.