Read Wancho Naga Wanwünkax 4 Bible Online

Wanwünkax 4 - Wancho Naga bible

Wanwünkax 4

¹Ku sa, hünpae nang hama chem anwot-anopuix ija to mongkoxlax. Ija to nathale jangchangba nange tsing-wankya kopüi.

²Kue nang hama anwot-anole ngokya a müikya changpu, idaile ibu pangwüi akax-adangle thomlax.

³Chemtue ku naosa tuita ang ngole tüikya hex, anu-apa nyi sasün ku tata,

⁴ipongma apae ku hama anwot-anole chang. Chixe thüi: “Kue akaxkyabu mong ma akhax-adangle thomlax ilaxle ibu taxalak. Kue nang füi chemle akaxpuix ile moklax, jangchangba nang ozün ma ngoüi.

⁵Je-hwon hia mongje koplax! Kue akaxkya alakle taxasam chichangba ku kax kaxzasa ang laxle ahaile taxchang.

⁶Je-hwon danle taxtox, she-e nang kho-awa angkya changle; she to mongkün tüilax jangchangba she-e nang khüzün müile thomüi.

⁷Nange moktsuak angkya amüikya a je-hwon kop angkya changpu. Nange chem koppuix, ija mong je ang koplax.

⁸Je-hwon to mongkün tüilax, she-e nang chongkya ang achangüi. She to künle koplax, üntoxle she-e nang hato achuak-achenkya apüiüi.

⁹She a nang zongto fuazangkya khohom ang changüi.”

¹⁰Ku sa, ku kax apalax. Kue nang füi akax ngokya to mongkoxlax, ile jangchangba nang tsünlole ngo ang kopüi.

¹¹Kue nang hama je-hwon hia ozün ma ngo angkya changkya lomtang anwot-anole fadaoa.

¹²Nang jetüi-hwonzaile jangaham thüiningle nang lomtang ma asua angkya chemchu münbang, ilaxle nang zikkya zuma nang chikho münasua.

¹³Nange awanle kopdaokyabu jento texle ataklax. Tsingwankya a nang khüzün changpu: ija to müile nyethomlax.

¹⁴Ochax khünakbu paokya khato nang taxpao. Chichangchizangkya khünakbu thüi anole taxchang.

¹⁵Ija taxmok! Ochax füi atsaile ngolax! Ija kax ma taxlax ikoxle nang lomtang ma küithole lelax

¹⁶Hwome thaikya mwot lituta mamok tanto chichang-chizangkya khünakbu ang mikngüt münhüi. Owawa to chakmok-janlangle machang tanto hwom mik azang lüwüi ngole.

¹⁷Hwom zongto chichang-chizangkya mwot hia changnong-pünthomle tüikya a juling-saxsaxkya ningle changpu.

¹⁸Otsao khünakbu ahamkya lomtang a, anyixning ang achangle süzaxzaxle dongkya zanghan dün ningle changpu.

¹⁹Tüle wüi changlax, chichang-chizangkyabu lomtang a zangnak üntoxle awünning changle. Hwom atile, ikoxle hwom chem ma asuale atipuix ija ngün ang chitho.

²⁰Ku sa, kue chem akaxpuix ija to mongkoxlax. Ku kaxbu to nathale apalax.

²¹Ibu nang chak angkya atsaile pao ang taxtom. Ibu a texle ataklax tamchu nang mongkha to akhax-adangle thomlax.

²²Owae ija tsinglaxpuix, ijae hwom ang khüzün hia müimüi-zangngaile ngokya tsün koxle.

²³Nang mongjang bama khünkhilax; nang khüzün a nang tutexbu makhange tix zingle.

²⁴Thaikya zang otuechu taxwün. Kaxthai zangwün hia dyen-lakyabu füi chemchu taxsa taxmok.

²⁵Nang mike thüntho chito tangthole hukox; azakle nang thün akhuxkya taxtüi.

²⁶Nange chem mokpuix ija müile ajang koplax, ilaxle nange mokkya mwot changle bangüi.

²⁷Ochax a tsiakle toxlax ikoxle thochito küithole lelax