Read Wancho Naga Wanwünkax 6 Bible Online

Wanwünkax 6 - Wancho Naga bible

Wanwünkax 6

¹Ku sa, nange owawa thashe bama hünlit laxüihex-ole tsaosax daopia?

²Nang zangwün hia nang kaxtsaobue nang alüile aman dao pia?

³Jangchangba ku sa, nang a ija mixsün chak to tüidaoa, ikoxlechu ikha tokya laile paotsuak angkya olom a ija changle: momle chix ha aloplax, ilaxle nang dan angkya tsaiju-kaxjule changlax.

⁴Nange nang jip ang taxkox chichangba nazak lax ang taxtün.

⁵Kam thoto o paokya ningle chichangba müihapmix thoto müikhi paole azangkya ningle ija kam thoto nang paole azanglax.

⁶Zaxkak mixbue tsükhi-tsiksabu ngokya zanglom makhange mwotlom awanle kop angkya oli.

⁷Hwom khama lompa, chongwang, chichangba apün-awangkya mix müntüi,

⁸ikoxlechu tsonue hwom sütling athünle koplaxle zangwa hüikya thoma atha-anyemle bangle.

⁹Zaxkak mix tuitae chemtukux pangnu khato atsele aham ngoüi? Chix jip chemtue zo angkya?

¹⁰Chixe thüi: “Onox ma chak kün laxle nazakle tam shuiüi.”

¹¹Ikoxle chix jiple ngotama, thua-jan füikya mix lailaile tui-nuake chix ziakople bangüi.

¹²Laxli chitüikya, chichangchizang khünakbue pangnu chito atsele aham.

¹³Nang dyen angkya hanpakma hwome mike jep, chak-khi füi hile,

¹⁴ipongma chimüikya hwom tutex ma chichang-chizangkya mwottho zing, ilaxle pangnu chito wüi cheile tingtui adün.

¹⁵Ija khokho ma, kaxho-ngaokhomkya chitüitoxle thamae hwom to thule hüiüi, ilaxle hwom a wün ang chimüile thomzün apongle changüi.

¹⁶JOWANPAe adu ang chithole anukya a oli anüt tüile: Mongngam mik-hu-thünza, atsekya le, chemngax chichangkyabu mik-amütkya chak, chichangchizang mwottho zingle alaikya khangka, chichang-chizangkya mwot mok ang momle zikkya cha, tuita füima tuitale mikngün kaxngai othai koxkya, ilaxle zuikhui bato tucheile amakya.

²⁰Ku sasün, hünpae chem akaxpuix ija moklax ilaxle hünnue anwot-anole fakya otuechu alakle taxchang.

²¹Ibu zangwün nang füi chithaile thomlax, ibu nang mongkha ma awünle koplax.

²²Ibu hwon-nwote aham pongma nang lomzunüi, zangnak ma kho-awaüi, ilaxle anyixningle nang to zünsaile changüi.

²³Adangle fakya ibu a wünnyan changle; achangle fakya ibue nang chemle ngokox müiüi ija anwot-anole fa ang tsuak.

²⁴Ijae nang chimüikya shekobu füi atsaile thom ang tsuak, owawa mix kakonu tunmüi zangwünbu füia.

²⁵Hwom sün-jo müikyae nang to thwontsingle chang ang taxtom; khuixle hukya hwom mik-hubue nang aman ang taxtom.

²⁶Lüka mixpa tuitae ankhao tuita koxlaxle tsangtsa hangkya mixcha tuita shakle apüi ang thoüi, ikoxle chinunchakkaikyae chix ma atüitüi komle tsangthom angkya laiüi.

²⁷Nange nyi chiashun homtoxle nang khaxtok ma wün kople aham ang tho ang chami?

²⁸Cha to chihuak homtoxle nang wünhan ding to aham ang tho ang chami?

²⁹Mix kakonu owawa füi jip-pomle chang angkya a itukuxle thama changpu. Owae ile moklaxpuix sikngün apongüi.

³⁰Wok ano pongma süt ahuxle saxkya ahuxmix wün khünaknue münhai;

³¹ikoxlechu chix a kople jangchang, chixe othom anüte nüile tsangthom angkya changpu: chixe chix ma atüitüi komkaile dantox angkya oli changpu.

³²Ikoxlechu chinunchakkaile changkya khünak ma chem tutex chemchu müntüi. Chixe chix alüile amüt ngopu.

³³Chix to thajao-wünhaile fit-müile changüi; chix a owüiole oman amütle chang ang tomüi.

³⁴Osing-nüfux tüipongkya tukux kakopa tuita a chemtuechu mongtsik-mongmale münchang; chixe olüix khomkya ma chem othüt müntüi.

³⁵Chixe tütaningkya tsangthom chu pongle münkop; tüta tukuxkya hingho-chaktwon füichu chix ang mongzom müikya müntüiüi.