Read Wancho Naga Hwon-Nwot-Jaono 1 Bible Online

Hwon-Nwot-Jaono 1 - Wancho Naga bible

Hwon-Nwot-Jaono 1

¹Ija a tuita Filosofar, Dawid sasün, owa Jerusalem ma wanghom changkya hex, chix zangwünbu changle.

²Filosofar e thüile, ija a laxli müntüi, laxli müntüi. Khünak tsün a laxli müntüi.

³Nange nang tsün a mwot mokle, thangle ngokya ma ahomle, ilaxle ija bama aho angkya nang ang chem tüi?

⁴Tsünthom ngui ilaxle tsünthom pao, ikoxlechu chaxwannu a otya ma wüi ngo.

⁵Anyixchu zanghannu dongle ilaxle dütle, chatle oham owang wang angkya hanpakma amikya mantong to.

⁶Zangwinsa shuathong to jep, shuakux to jep: chatle wüi jep, chatle wüi jeple anguix.

⁷Shuajen pangwüi tinu shinthuk to jenle ju, ikoxlechu anyix kople tinukha tie ma-awang. Ti a shuasa tümik fuakle owang wangkya nui to chat.

⁸Pangnulie khünak na-juale max ang tomle: kax ka itukuxle wün ang chithole na-juakya. Kem mik füi mongtex ma shale ngün ang müntho; kem na füi okhonguile atat ang müntho.

⁹Thochi ma chem changle ledaopuix ija füichi machu changle hüiüi. Thochi ma chem mokle tsuakdaopuix ija anaole chuwüi moktsuak angkya changle. Zangfang ma ija hozün changpule thüi angkya chemchu müntüi.

¹⁰“Hulax, ikhama tütali hozün tüile!”, le hwome thüitüi. Ikoxle ija münchang, ija a kaiwüi, kem mapux tanto wüi changle hüidaokya tuita changpu.

¹¹Thochi ma changle ledaokya khünak owaechu akhaxle münthom, ilaxle athax hia füichi ma chempang changle hüiüihex ija owaechu akhaxle münthom.

¹²Filosofar, ku a Israel thakma Jerusalem ma wanghom tuita changkya.

¹³Ija zangfang ma chempang mokle hüipuix ibu pangwüi olom tole ano angkya tamchu ibu thwonlop angkya kue mongto zangwünle tsuak. Zang-e kem ang sikngün ashukle mokle sax angkya osho koxle thomle.

¹⁴Ija chaxwannu ma pangnuli mokle tsuakkya kue ngündaoa, ilaxle kue nang ang thüipu, ibu a laxli chemchu müntüi. Ija a tuita zangwin achuale ngokya thatha.

¹⁵Kwome ngoünkya nange ajung-atang ang müntho; ikhama chitüikya oli nange akiak ang müntho.

¹⁶Kue alüile ku füi akaxpu: “Ku a chongkya khünak tuita, ku thoma Jerusalem to apünle hüikyabu pangnu to nüile jetüi-hwonzaikya mix ang achangdaoa.”

¹⁷Kue awan-atsingkya hia chiwan-chitsingkya, jetüi-hwonzaikya hia ongat, ibu chemle mali-mali hex ija awangse tsu. Ikoxle ija a kue zangwin mantole ngokya changle atak.

¹⁸Nang chemtukux jetüi-hwonlangle changpuix, itukuxle nang mongthang; nange chem tukux tsingpuix, itukuxle nang mong thomzün.