Read Wancho Naga Hwon-Nwot-Jaono 11 Bible Online

Hwon-Nwot-Jaono 11 - Wancho Naga bible

Hwon-Nwot-Jaono 11

¹Mixnok füi thalex ang nang ngun-syen danlax, jangchangba nyix-nyix-ta nang ang olüi tüiüi.

²Nange ngun-syen malom-malom to danlax—chemthüikoxle ija chaxwannu ma nange chemningkya osho-jowan apongüihex müntik.

³Pün a tüta chito wüi nguakkoxlax, ija a nguakkya khama tinthui le ngoüi. Chemtue zangfwom awangle tüiüihex zangwatle.

⁴Ikoxle nange zangmüi puaka angkya tanle jangngo, nange chemchu ali-akan ang müntho ilaxle nang ang puamün müntüiüi.

⁵Pangnuli Zang-e zingpu, ilaxle honu wok-kha to nao chemle khünak ang achangpuix ija chitik tsuakkya ningle keme chix mwot müntiktsuak.

⁶Nange anopningle tamchu hansongechu küi-thwomle changlax, ikoxlechu ija müile tsongüi hia chitsongüi tamchu mixe küi-thwomkya füi ataxle chimüimüiüi nange müntik.

⁷Anyixningkya zangngai füi mongmüile ngokya wüi amüikya changpu.

⁸Nang ozün ma ngole hüikya zanglao pangnu füi mongmüikya tüikox. Nang tsünlole ngokya ma tüikya münchang, ija füi sülole nang zingo angkya changpu, ija tikle koplax. Thochi to achale hungo angkya olom chemchu müntüi.

⁹Tsünzünbu, naocha-naosün pongma mongmüile ngolax. Nang tsongtan tüipongma mongmüi ngolax. Nange chem mokse tsupuix moklax, ilaxle nang mong atsutsu ma lelax. Ikoxlechu nange mokle hüikya pangwüi hanpakma Zang-e kaxfün angkya changpu, ija taxalak.

¹⁰Chemlie chu nang mongthang ang tamchu nang to kak ang taxtom. Nang tsünzün ma okuilole ngo angkya le münchang.