Read Wancho Naga Hwon-Nwot-Jaono 12 Bible Online

Hwon-Nwot-Jaono 12 - Wancho Naga bible

Hwon-Nwot-Jaono 12

¹Ikhoma nange: “Ku ku tsün füi mongzom müikya müntüi”, le thüi angkya chisumüikya chaxwan zanghan hüiüi thoma, nang tsünzün ma tüipongma nang Zingpupa texle ataklax le thüikya angchu achangle tüile.

²Chemtue nang hato lyetnu, zanghan hia lyettsibue fakya chitüile changüihex tamchu zangwat ajo angkya zangfwom tam chihüile changüihex, iningkya a nang hanpakma ija nyix ang changüi.

³Ipongma, nang chak ojao nang kho awale hüidaopuix, ija abünle maxüi ilaxle nang cha, oja athax tsak-zongle tüipuix, ija naile maxüi. Nang ang süt shao angkya wa hidaole wüi tüiüi, ilaxle nang mik füi nange tsaothale ngün ang chithole changüi.

⁴Tingjang lomnu tokya zingzua atat ang nang na bale changüi. Nange saxthut oling ngaokya hia klingkingkong zing muapongsa wüi atat tsuaküi ikoxle osa ngaoe ngaxchu nang mikngüt ate le changüi.

⁵Haxfa hia haxkhobu thua nang zaüi, ilaxle aham angkya a thomzün tuita ang changüi. Nang khangmun a thole paoüi; nang ma tompo anukulaxle linle ahamle changüi, ilaxle tütali laxse saxse sungkya samle paoüi. Kem a oshuk nazaknui hato paole ngopu, ifüima tingjang lomnubu to sop-juakya tüiüi.

⁶Khop janbüi a pale paoüi, ilaxle hun wüntik a dütle ashixle paoüi; tüküi angkya zu a fünüi, ilaxle ti tik a thokle awütüi.

⁷Kem tsangtsa a chaxwan angkya haxbu ang achangle chatdaoüi, ilaxle khüzün zakdün a kem ang ija koxkya Zang hato chatdaoüi.

⁸Laxli müntüi, laxli müntüi, thüile manpae. Ija pangwüi chilaxlili wüi changle.

⁹Ikoxlechu manpa a tüle jetüi mix changkya khoma, khünaknu hama chixe awankya pangnusa anwot-anole ngo. Chixe wanwün-kaxbu to otua lomle ano ilaxle ibu otsingtsing füi wanle ano.

¹⁰Manpae mongsom zangwün atak ang azong, ikoxle chixe zakya kaxhuakbu a otsingtsing ang chang.

¹¹Jepa mix zangwünbu a tuita otun anaxle tüikya chun-nyetmixbue chunbu lom azüi ang twonkya kiathoxbu ningle, ilaxle süile athünkya wanwünkaxbu a zudakle takle amongkya janza ningle. Ibu a Zang tokhange koxkyabu changle; chix a kem pangnu hanpak ang tuita wüi tüikya Chunnyetpa changpu.

¹²Ku sasün, hule nye ngo angkya oli tuita tüile. Laipex zakya ma oshuk tam müntüi, ilaxle angangle lai lomkyae nang mongthang ang tomüi.

¹³Ibu pangnu füima, zangwün angkya oli tuita wüi: Zang chathua zalax, ilaxle chix kaxtombu kax ma laxle tüilax, chemthüikoxle kem a ija hanpakmale zingle alaikya changle.

¹⁴Kem mwot pangwüi bama Zang-e kaxfün fa angkya changle, chimüikoxlax müikoxlax, huxsa ma mokle changdaokya bama ngaxchu wüi.