Read Wancho Naga Hwon-Nwot-Jaono 3 Bible Online

Hwon-Nwot-Jaono 3 - Wancho Naga bible

Hwon-Nwot-Jaono 3

¹Ija zangfang ma chempang changle ngopuix ibu pangwüi Zang-e tex-tyale thomkya hanpak-zanghan ma changle ngopu.

²Chixe pux angkya hia zi angkya hanpak tyale thompu, küi angkya hia fuakle awüt angkya hanpak tyale thompu,

³mik-amüt angkya hia azün angkya hanpak tyale thompu, pün angkya hia zingle alai angkya hanpak tyale thompu.

⁴Chixe mongma angkya hia mongmüi angkya hanpak tyale thompu, mangsop angkya hia azüi angkya hanpak tyale thompu,

⁵mong akün angkya hia mongkün afan angkya hanpak tyale thompu, tun apong angkya hia tun chiapong angkya hanpak tyale thompu.

⁶Chixe atak angkya hia amüt angkya hanpak tyale thompu, sünle kop angkya hia chilaxle awüt angkya hanpak tyale thompu,

⁷akyet angkya hia atsam angkya hanpak tyale thompu, dang angkya hia akax angkya hanpak tyale thompu.

⁸Chixe mongkün angkya hia anu angkya hanpak tyale thompu, achax-azan angkya hanpak hia tumüile ngo angkya hanpak tyale thompu.

⁹Keme mokkya mwot makhange keme olüi chem kop angkya tüi?

¹⁰Zang-e kem khangkho ma alikle thomkya hünlit chongkya kue awanle.

¹¹Tütali hanpakma chu chixe bakle lyettex-hantya thompu. Chixe kem ang füichi hanpak awanle kopsele tsukya mong koxle thompu, ikoxlechu chixe chempang mokle tüipuix ibu mongzom müile tikle lax ang chitom.

¹²Idaile kue texpu, keme moktsuak angkya oli a mongmüile ngo angkya ilaxle ozün ma tüipongma tsuakkya tukuxle müile mok angkya, ijatix changpu.

¹³Keme mokkya mwottho ma kem pangwüi sax-lingle tamchu mongmüi-pwonlale sax-mok angkya changpu. Ija a Zang hingho changle.

¹⁴Kue tsingpu, Zang-e chempang mokpuix ibu pangwüi oshuk chitüile ngoüi. Nange ija to oli tuitae bo ang müntsuak chichangba ikha angkya oli tuita apao ang müntho. Ilaxle Zang-e mokkya tuita a, chix ngünlaxle kem khomtsile ajong ang tom angkya, ija changle.

¹⁵Chempang changle hüidaopuix chichangba changtsuak angkya hex ibu pangwüi changle ledaoa. Oli tuitata wüi Zang-e chatchatnaole changle ngo ang tompu.

¹⁶Ito bole, ija chaxwannu ma, sukya hia changkya olom tüihaxkux ziama chichangchizangle tüikya kue ngün ang kople.

¹⁷Kue ma füi alüile akaxle: “Otsao hia ochax pangwüi to Zang-e kaxfün tomwüi fa angkya changle, chemthüikoxle pangnuli, pangnu mwot, chixe tyale thomdaokya hanpak ma changle hüi angkya changpu.”

¹⁸Kue ile texpu, Zang-e kem to thwontsing ngopu, ija a kem chuwüi tuita akhwomkya müi thatha changpule aho ang.

¹⁹Wünhax thüikoxle, müi hia mix pangwüi hato osho tuitata wüi hüile ngopu. Khünakchu ata müi lailai wüi zile paotüi. Hwom a talailaikya zünmok chang koxle. Khünak tuita chuwüi müi füi ataxle müipule chichang, chemthüikoxle pangnyi hanpakma wüi tsün a chemchu chichang.

²⁰Okhi pangnyi wüi onui tuita to ngui angkya changle: ija haxwan hato a. Okhi pangnyi wüi ija makhange hüikya changle; hokhi pangnyi wüi ija hato chatdao angkya changle.

²¹Khünak chasa a ding to dongpu ikoxle müi chasa a hax fang to kapu le owae tütsingdao?

²²Idaile kue texpu, keme chem mokdaopuix ija füi mongmüi-pwonlale ngokox. Iboma keme moktsuak angkya oli tuita müntüi. Kem zile paokya füima chemle changüihex ija awan angkya kem ma olom chemchu müntüi.