Read Wancho Naga Hwon-Nwot-Jaono 4 Bible Online

Hwon-Nwot-Jaono 4 - Wancho Naga bible

Hwon-Nwot-Jaono 4

¹Ifüima kue ija chaxwannu ma chisukya mwot mokle ngokyabu to hule anopu. Mix fangto ngokyabu a sople ngo, ilaxle hwom to owaechu chifong tsuak. Hwom to owaechu chifong tsuak, chemthüikoxle hwom to afangle thomkya khünakbu ma tsak-zong tüile ngo.

²Zi laxle ka ünkyabu to kue osingle hu; anyix ozün ma tüikyabu füi hwom wüi amüikya.

³Ikoxlechu pangnu füi chipuxkyabu wüi amüikya, chemthüikoxle hwome ija chaxwannu ma tüile ngokya chisukya mwot chemchu ngün ang chikop.

⁴Büthüikoxle khünaknue tata man ma lüi ang azongle mokpuix, ija kue tsing: ija a hwome ma tomzi ma tüikya tuina to osingkya khoma changle. Ikoxlechu ija ma laxli chemchu chitüi. Ija a tuita zangwin achuakle zikngokya thatha ang changpu.

⁵Keme chak kün laxle ngo angkya tamchu ma alüile woknuak ang azik angkya a ongat changpule hwome thüile.

⁶Ija changtüilax, ikoxlechu pangnyi chak füi azongle mokle, zangwin to achuakle ngokya füi muale wüi tüi üntoxle mongsom ma ngokya wüi amüikya.

⁷Kue tsün ma laxli chitüikya olichu ngün ang kople.

⁸Ikhama chix tata ngokya mix owawa tüile. Chix ang sasün tuita chitüi, tüi-hi-nao tuita chitüi, ikoxlechu chixe nazak chitüile mwot mokle ngole, ilaxle ma ma tüinangkya füi mongzom tam chimüitox. Ma mongmüi ahaile toxle, ipongpong azongle chixe owa hanpak ang among ngopuix? Ija chuwüi laxli chitüikya changpu, —ilaxle chingcha ashukle ngokya olom changpu.

⁹Tuita füi anyi wüi sümüi, chemthüikoxle hokhi anyi tomlaxle sümüile mok ang tsuak.

¹⁰Okhi tütapu dütle jangchang, chix adün ang tuitae fong ang tsuak. Ikoxle owawa, chix tata ngokya dütle jangchang, ija a huanu ziama ang changpu, chemthüikoxle chix to fongtsoxle chang angkya mix owa chitüi.

¹¹Zangkongle jangchang, anyi a tomle jiplaxle lomlule ngo ang tsuak, ikoxle nang a nang tata lomlule chemle ngothoüi.

¹²Mixhuak tuita to lüt-se zansing füi mixhuak anyi a awale ajong ang thoüi. Zi azom ma fwonle zingkya zu afün ang chithole tsakle.

¹³Owawa zasa chifün tokhange chix chaxwan ma wanghom tuita angchu achang thokoxlax, chichangba kun kha tokhange wanghom tüntong to dong ang thokoxlax, ikoxlechu chix azu füima mixtsai-mixkax je füi pongle kop ang chiman jangthüi: chix a tuita zasa chang koxlechu jetüi-hwonlangle tüikya naosün tuita tha ngaxchu münchang.

¹⁵Kue ija chaxwannu tok ma tüikya khünaknu hanpakma ajangle ano, ilaxle hwomkha angkya naosün owawae wanghom ngwotnui kop angkya kue awanle lax.

¹⁶Wanghom tuitae apünkya fang ma khünak huak othüt chitüile chu tüitüilax; chemtue chix zile paoüihex, chixe moktoxkya mwotbu bama nomfuisule thüi angkya mix tuita chitüiüi. Ija ma laxli müntüi. Ija a tuita zangwin achuale ngokya thatha.