Read Wancho Naga Hwon-Nwot-Jaono 5 Bible Online

Hwon-Nwot-Jaono 5 - Wancho Naga bible

Hwon-Nwot-Jaono 5

¹Zangshwom-Hom to nguikya bama khünzailax. Ikhato, chisukya hia sukya nyi ba süile awang ang chithokya ongat khünak tuita ningle tö koxkya füi tütali olom tsingle lax ang nguikya wüi tüichong.

²Nange akaxüi thoto ajangle koplax, ilaxle Zang pomtho ma tütali jansuma tsaosaxle taxchang. Chix a zangkangting to ilaxle nang a chaxwannu ma, idaile nange akaxse boma onüi akaxle taxchang.

³Nang chemtukux khosamüihex, itukuxle nang ang wünmang maüi, ilaxle nange zang chemtukux wünpuix, itukuxle nange ongat kaxbu akaxle changüi.

⁴Ikhoma chemtue nange Zang pomtho ma tsaosaxle changüihex, ija a tsuakkya tukuxle chwonle thom ang azongkox. Chix füi ongatbu ang chem mwot müntüi. Nange chem tsaosaxle changdaopuix ija mokle alyet kox.

⁵Tsaosax üntoxle ija chithomle changkya füi ojaojao tsao chisaxkya wüi si.

⁶Nang zangwün-e nang ochax to taxalyet, chichangba nange Zang nguapa ang ile münchangle thüi angkya laiüi. Büthüikoxle nang zangwün füi Zang ang mongtsik adün angkya? Nang chak mwot komkaile omalax ang ama ang tom angkya?

⁷Nange wünmang chemtukux wüi ngün-ngo ünkoxlax, chilaxli mwot nange chemtukux wüi mokngo ünlax, chichangba nange zang chemtukux wüi wünlax, nang a Zang thuaza lüwüi ngo angkya changpu.

⁸Nange apün-awangkyabue mixshix-zasabu to ada laxle hwome ang sukya kaxfün hia hwom süntswon chifale tüikya ngünpongma nang taxabüt. Alixachongbu pangwüi ma thak angkya alixachong tuitae ziakop laxle tüipu, tamchu hokhi pangnyi a süthak angkya alixachong tuitae kho-awale thompu.

⁹Wanghombu ngaxchu hwom puamün to onglax ngopu.

¹⁰Nange ngun-syen to mongkünle jangchang, nang ang otuechu mongzom müikya müntüitox; nang ahak-aluase sungkya jangtüi, nange laxse tsupupu otuechu nange münatak tox. Ija a laxli chitüikya changpu.

¹¹Nang chemtukux ahak-aluale changpuix, tux angkya wikha nang ang itukux bangüi. Nang ahak-aluale tüile le awankya tix wüi nange kopkya olüi changpu.

¹²Mwotmixbu ang sax angkya süt okhonguile tüilax chichangba chitüilax, hwome zangnak ma mikngün müile jip ang atakle. Ikoxle hakpa-luapa tuita, chix ma mikngüt müile jip ang chithole tüikople.

¹³Chaxwannu ma kue za-adünle ngünkya oli tuita tüile, ija a: hwome lomkya thoma naxbang ang khünaknue ngun athünle thomle,

¹⁴ilaxle ija chimüikya lom to ija asamle ilaxle ma su-sa hwom hanpak ma ota chitoxle ashukle.

¹⁵Keme ija chaxwannu a, ikhato chemle nguipuix ilailaile danle toxpu—ohua ma a. Keme ipongpong azongle mokkya kha angkya keme koplaxle pao angkya chemchu chitüi.

¹⁶Ija a sukya münchang! Kem chemle nguipuix ija ningle paopu. Kem azong-amongkya a, tuita zangwin kop ang azong ngokya ang changpu, ilaxle keme kopkya chem tüi?

¹⁷Keme kem tsün a zangnak ma tamchu mongma, ma künbüt-mongban, mongtsik, tamchu okak-olak ma ngo ang koppu.

¹⁸Kue atatkya ikhama tüile: keme moktsuak angkya sümüikya mwot a: saxkox laxkox üntoxle mongmüikox ilaxle mazi tanto Zang-e keme ang koxkya mwot füi mongmüi-pwonlale ngokox; ija a kem osho changle.

¹⁹Zang-e kem ang tuina hia tingtok koxle jangtüi, keme ibu twon ang mongmüi hax. Keme chem mokdaopuix ija bama kem mongmüikya hia pwonla dongkya tüihax. Ija a Zang tokhangkya hingho changle.

²⁰Kem chuwüi Zang-e mongmüile ngo ang dan daokya jangchang, kem a moxwüi moxle tüikya tsün tuita bama kem abüt-abanle chingoüi ilaxle ija tsün chemthüi ang ipongle moxpuix le a.