Read Wancho Naga Hwon-Nwot-Jaono 8 Bible Online

Hwon-Nwot-Jaono 8 - Wancho Naga bible

Hwon-Nwot-Jaono 8

¹Tütalichu, ija chem hexle jepae tix tikle laxpu. Je-hwone hwom nyi ang tomle ilaxle hwom thünza angkya mongma max ang tomle.

²Wanghome chem akaxpuix ija moklax, ilaxle khongkhao-loklaole Zang füi tsaosaxkya chemchu taxtüi.

³Wanghom-e chix mong ma atextex pangwüi moktsuak, idaile chix tuntho angkya atsailax; iningkya thama onui ma taxngo.

⁴Wanghome apün-adakya tsak-zong füi mokle, ilaxle chixe mokkya füi owaechu alün ang müntho.

⁵Nange chix kaxtom kax ma laxle ngokya kople, nang to chem münthüi: ilaxle ija chemle tamchu chemle moküihex, je füikya khünak tuitae tsingle ngopu.

⁶Tütali mok angchu asukhakkya hanpak hia asukhakkya olom tüipu, ikoxle keme hidaole wüi awanpu!

⁷Chemle chang angkya hex kem opupuechu münawan, ilaxle keme hama apuale fa angkya mix owachu chitüi.

⁸Zihaxkux azün angkya owaechu müntho chichangba zi angkya nyix amüt ang müntho. Ija a keme tsiaktox ang chimüikya zanhok tuita; keme kem lomtang dyenlale chang ang müntho.

⁹Chaxwannu ojong ma züizüi ang tsak-zong tüile ngo ikoxle mamabu a hwom fang to sikngün zolit ma ngo, iningkya chaxwannu to chempangle mokdaopuix ibu ajang ano pongma ibu pangwüi kue ngün ang kople.

¹⁰Changle, chichang-chizangkya khünakbu akhünkya tamchu hwom zuk-kha to ngokya kue ngünpu, ikoxlechu zuk tokya chatüi lom to, hwome ochax mwot mokle hüikya tingnu ma wüi khünaknue ibu to achuak-achenle. Ija ma laxli chemchu müntüi.

¹¹Chaktung-chaktung ma khünakbue mütkop mwot büthüikoxle mok? Chemthüikoxle mütkop to janpüi ma sikngün fakya chitüikoxle.

¹²Ochax khünak tuitae oho to lünle mütkop koxlechu ozün ma wüichu ngole. Oh changle: “Nange Zang kax ma laxle jangchang thüiningle, pangwüi sukya ang changpule hwome akaxkya kue awanle,

¹³ikoxlechu ochax khünakbu zongto ija omüi ang münchang. Hwom tsün a zangkhung chaxba tuita ningle ilaxle hwom tsünzün ma wüi zile paoüi, chemthüikoxle hwome Zang kax ma chilaxle tüikoxle.”

¹⁴Ikoxle ija a laxli chitüikya. Chaxwannu ma chempangle changpuix hule anolax: tamtampong a otsao khünakbue ochax khünakbu chak to sikngün apong angkya laile, ilaxle chichangchizangle tüikyabue mix otsaobu hingho pongle laxle. Kue thüipu, ija ma laxli müntüi.

¹⁵Kem mongmüile ngo angkya chuwüi changpule kue pongle kople, chemthüikoxle ija mazi tanto kem mongmüi-pwonla ma ngo angkya a saxlingle tamchu malualua to mongmüile ngo angkya changle. Ija chaxwannu ma Zang-e kem ang koxkya tsün ozün ma ngotanto azong-amongle mokmo pongma keme ija ngaxchu mok angkya changpu.

¹⁶Chemtue kue jetüi-hwonlangkya mix tuita ang achang ang azongpuix tamchu chaxwannu ma changle ngokyabu awan ang azongle changpongma, ipongma kue ajangle laxpu nang a zangnak zangngai chijip-chipomle changtüi angpu

¹⁷ilaxle Zang-e mokle ngokya mwot chemtuechu awan ang chitho. Nange chemtukux wüi azonglax, nange ija atak ang müntho. Jetüi-hwonlangkyabue awanle le thüikoxle, ikoxlechu hwome müntsing.