Read Wancho Naga Hwon-Nwot-Jaono 9 Bible Online

Hwon-Nwot-Jaono 9 - Wancho Naga bible

Hwon-Nwot-Jaono 9

¹Kue ibu pangnu bama okuilole tamchu zongbakle ajangdaoa ilaxle jetüi-hwonlangkyabu hia otsao khünakbu mwot, tamchu hwom mongkün hia miktsak-mongngwom pangwüi to Zang-e akumathumle changkya kue ngünle. Thünthochi ma chempang tüingopuix ija owaechu awan ang müntho.

²Kem osho tuitata wüi. Otsao hia ochax khünak, müikya hia chimüikya khünak pangnusa hato osho talailaikya wüi hüile, opang otsao hex ilaxle opang otsao chichangpuix, opange töbu koxpuix ilaxle opange chikox puix. Müikya khünak tuita a ochax khünak tuita füi amüikya le münchang; tsaosaxkya khünak tuita tsao chisaxkya khünak tuita füi amüikya le münchang.

³Pangnusa hato wüi osho talailaikya hüile, ilaxle ija a chaxwannu ma tütali changle ngokya füi tomwüile thaile. Khünaknu ozün ma ngokya kople, hwom tutex ma ochax hia ongate awangle tüile, ilaxle hwom allele sünto zile paole.

⁴Ikoxle ozün ma ngokyabu ngwotnui chaxwannu ma ngokya mix pangnusa ang wüi monghom angkya oli tüipu; mailang omang füi ozün ma ngokya hi wüi si.

⁵Changle, ozün ma ngokyabue hwom zi angkya wüile tsingle ngole, ikoxle omange chemchu chitsing. Hwome ija thole angkya hingho mama chitüi; hwom ang pangwüi alakle asam.

⁶Hwom mongkünle, hwom miktsak, hwom mongsung, ibu pangwüi hwom füi tomle zile paodaoa. Ija chaxwannu ma tütali tochu hwome tamsax-tammok angkya le müntüi.

⁷Thotho thuile le-kox—nange süt saxlax ilaxle mongmüile ngolax; nang ju linglax ilaxle pwonla dongle ngolax. Zang zongto ibu pangwüi changkya olomlom wüi.

⁸Othuithuima mongmüimüile tamchu pwonla dongle ngünlax.

⁹Ija chaxwannu ma nang naxli chitüikya tsün ozün ma ngokya tukma, nang tsün nange mongkünkya mixhuak tuita füi mongmüikya. Ija laxli chitüikya hanpak a nange mongmüile akailax, chemthüikoxle ipongpongle nang sikngünkya fux lüi ang nange koptsuak angkya a ija tix changle.

¹⁰Nange chem mokpuix ikhama mwot a zongbakle mokkox, chemthüikoxle amalum to mok angkya, ajang angkya, jen-hwon ibu chemchu müntüiüi—ilaxle nang a ikhato paole ngopu.

¹¹Kue mama olichu ajangle lax, ija a, ija chaxwannu ma jento momle-momle zikkyabu tix longzi alop tsuakpu le münchang, ilaxle mongchongkya mixe tix zanhok ma anaopu le münchang. Jepabue kop-lole saxpu lechu münchang, tsing füikya mix ahak-aluapu le münchang, ilaxle tsuakkya khünak pangwüi alixachong ang achangpu lechu münchang. Shoma a pangnusa hato azutle hüipu.

¹²Nang hanpak chemtue nguile ngopuix nange mün-awan. Alle osa tsün ma manle laxkya ningle, nya ma nyax amanle laxkya ningle, keme sukhachinale ngopongkhae tuwan-zanghan chimüikya kem amanle.

¹³Kue ngün ang kopkya oli tuita tüile, ija a chaxwannue je-hwon to chemle e-sele changpuix, ija apyenkya.

¹⁴Ija ma khünak alüile chitüikya tinglong tuita tüikya. Tüta tsak-zong füikya wanghom tuitae ija to sing. Chixe ija akhople kop ilaxle pan atsunlaxle single dong ang achwon.

¹⁵Ikhama tuimix-nuakmix tuita ngole tüikya, ikoxlechu tinglong sünle tsuaktangkya je chix ma tüile ngo. Ikoxlechu chix a owaechu akiak-akungle chingo.

¹⁶Kue jento akax ngopu je-hwon a janzüi füichu sümüikya changpule, ikoxle owae tuimix-nuakmix bama hwom ma je tüile ngoünpuixle owaechu ajangle chingo chichangba hwom zangwün to owaechu na chitha.

¹⁷Ongat nguawangbu akhongle ngokya to apakya füi jepa tuita huxsa zangwün to apakya wüi sümüi.

¹⁸Chang-pax füi ngaxchu müikya mwot je-hwon-e wüi sümokle, ikoxle ochax khünak tuitae müikya mwotbu huanuma achat ang tsuakle.