Read Wancho Naga Tsaitax-Ngaonüi 4 Bible Online

Tsaitax-Ngaonüi 4 - Wancho Naga bible

Tsaitax-Ngaonüi 4

¹Ku mowünnu sün jo chemkuxma müipuix! Khangkho nyi khung to mongkün füi nyanle, nang mik-hu ning chemkuxma müipuix. Nang shingsham le azüi, zwonzyem fütüi ningle, Gilid haxnu tokya zwonzyem juüi ningle.

²Nang wasa tsekya aning chunmun lailaile, athax ile onglaxle sole atsaokya chun mun sa ningle. Hwom kha angkya tuita ngaxchu makhai; müi wüi müile tsyenthuile.

³Nang tunpünsa aning, haxkhi-zangsum daxzat zusa lailaile; ibu chemkuxma müipuix, nange zangwün pongma.

⁴Nang dingtom a Dawid homthün lailai, anguix wüi anguix tamchu nün wüi nün, ija akhople, ojat khonguile dibu asha thomkya ningle likwün füi.

⁵Nang tsombu a tahunutsule, lili tham to otsom siple ngokya müikhisa anyi lailai.

⁶Ku a jingso tüikya haxkho ma ngoüi, ongan müikya so haxkho ma a, swomsa zangwine majep-majeple tamchu zangnak paole machang-machangle.

⁷Nang sün chemkuxma müipuix, ku mongkün; nang ma jao angkya kha jao müntüi!

⁸Ku füito oman Lebanon Haxnu tokhange, ku tuinu nang; ku füito oman Lebanon tokhange. Amana Haxnukho tokya juhüi, Senir hia Hermon Haxnu nyi kho tokya a, mailang hia fuachaxbu ngwotnui tokya a.

⁹Nang mik-hu thünzamsa, ku mongkün tamchu ku tuinu, tamchu nange alik ngokya likwaisae ku kün-mong ahuxle paodaoa.

¹⁰Nang mongküne ku mongkha zang angaile, ku mongkün ku tuinu. Grep-ti füi ngaxchu nang mongkün wüi sümüi; nang ongan müikya münga a tüta ningle ongan müikya so füichu müile nganle.

¹¹Nang tunpün ma tüile nax-ti ningle tikya, ku mongkün; ku zongto nang lesa a tsomti hia nax-ti jaojao changle. Nang nyiwun ma Lebanon angkya so ngane awangle.

¹²Ku mongkün, ku tuinu a, haxdop tokya küisa tong changle, zün zailaxle tukthomkya küisatong, süile khokya aka longja lua;

¹³ikhato pünsa-zuasa wan huanuma müile. Ibu a pomegrenet pünbu küile tüikya tsawat tuita ningle ilaxle oziak amüimüi ziakle. Henna hia nard pünbu tomning awang jao awangle tüile,

¹⁴saffron, pongkong, hia sinamon, chichangba jingso oli pangwüi ima tüile. Ongan müikya so hia aloi-pün ibu ikhama nyemle, ongan müikya khama ibu ma akhole.

¹⁵Tsawat khato ti kox ang tümik fuakle, shuabu angkya jajenbu jenle, Lebanon Haxnu tokhange fuakle jenle jule janfaoti.

¹⁶Zolax, Shuakux Zangwin. Shuathong Zangwin, jepkox ku tsawat to; zangwinsa ongan müikyae awang ang tomkox. Ku mongkün ija tsawat khato naxngui ilaxle ima tüikya pünziak sümüikya naxsax.