Read Wancho Naga Tsaitax-Ngaonüi 6 Bible Online

Tsaitax-Ngaonüi 6 - Wancho Naga bible

Tsaitax-Ngaonüi 6

¹Sheko khama sünmüicha, nang mowünpa omaüna-o? Chix lekya lom kwom hama apuale fahüi, Chix atak angkya kwome nang to asun kuxma.

²Ku mongkün a chix mwonsa to kaüna, balsam pünbu nyemle tüikya khato a. Chixe chix haxtok ma chunbu ang osüt asüt ngole ilaxle lili maipuabu pakle afox ngole.

³Ku mowünpa a ku kux changpu, ilaxle ku a chix kux changpu; chixe chix chunbu lili maipuabu tham to osüt asüt ang danle.

⁴Ku ashem, nang a Jerusalem ningle müi, mongkünkaikya Tirzah tingnu ningle, chongkya tingnu ningle khosamsüile.

⁵Ku to hupu nang mik shong-paohu; ibue ku a da tuita ningle kople thomle. Gilid Haxnukho tokya zikle juüi zwon zyem ningle, nang kho aning shingsham le.

⁶Nang wabu a tse wüi tse, athax namsokya chunbu ningle. Tutachu pun-khaikya chitüile; pangwüi atomtile pax wüi pax.

⁷Khangkho nyi fang to nang bwomzongsa zung wüi zungle.

⁸Wanghompa ang wangcha puzom, wangnu hwom puli, khua-naocha hwom o-echithole chu kangnaxtüi.

⁹Ikoxlechu kue tuita towüi mongkün, she a tuita suosa ningle mongkünkaile. She a honu ang tuita wüi tüikya sacha, honue tüle künkak-mongkünkya nao. Shekobue she ngünlaxle noknue she achuak; wangcha hia wangnubue she achuakle tsai ngao.

¹⁰Mik-husa wüi huazung zangngai ningle ija a owa? She a osün müi wüi müile, kaküile, lyetnu zanghan ningle nyan wüi nyan.

¹¹Ku a almon pün tham to jule haxsha angkya pünbu to hu ang, grep-zu chuikya chakzün to hu ang tamchu pomegrenet pünpuabu to hu ang.

¹²Ku a abünle; man-kanlin ham mix ang zankat mongtsukya ningle nange ku ang mongkün to mongtsu ang tom.

¹³Azüikox, azüikox, Shulam angkya naocha. Kwome nang azüikya to hufang. Nange ku azüikya to mix tham tokhange chemtomta to husele tsukya?