Read Wancho Naga Tsaitax-Ngaonüi 8 Bible Online

Tsaitax-Ngaonüi 8 - Wancho Naga bible

Tsaitax-Ngaonüi 8

¹Nang a ku atüi namchanglaxba, ku anue she tsomti füi tuxle atsünkya mixsün a. Ifüima, tingjang lomnu to kue nang apongle jangchangba, owa mongma angkya chitüile kue nang füi tun apongle changse.

²Kue nang anu hom to apüise, ikhato nange ku ang mongkün anole fase. Kue nang ang grepti-ju amüikya fase, kue homkya pomegrenet ti alingse.

³Nang nongchi chak ma ku khang ate, nang tsaxchi chak füi ku tsawan to jwomle.

⁴Tsaotsüt hu, Jerusalem angkya mixchabu, hünzome kukhi mongkün to münpoxpu-ole.

⁵Sak-haxchi tokya nguile ngokya chuja owahex, mongkün shem füi akün-künshi lea? Apel pünsum fang ma kue nang azwotpu, ojongkha ma nang puxpuix, ikhama a.

⁶Ku mongkün zongto wüi chichangba mama zongto nang mongka hakdao; Ku boboma nang ahuijak füi owa to chu taxkün. Mongkün a zikmüt-mangkho büta janzüi füikya changle; zao-hi-sungkya zikmüt-mangkho füi tomwüile tsak-zongle tüipu. Ija ma wünnu dong lüjao wünchua laile ilaxle tsanwün lailaile zokle ashunle.

⁷Ti füi ija amüt ang müntho; chemningkya tichen füichu ija to chwople chang ang chitho. Ikoxle owawae tuina füi mongkün shak ang azongle jangchang, chixe ma mong athokya boma chemchu münkop.

⁸Kwom ang kwom nao naocha tuita tüile, ilaxle she tsom-sax athaxchu hixtan. She hanpakma kwome chem moküi, she füi ashemsele naosün tuita namhüiba?

⁹She a tuita katuk chang koxba, kwome she ka khop-jan long füi tukle koxse. She a fülom tuita jangchang thüingaxchu, kwome sedar pün kapatbu füi aja laxle she sünle kopse.

¹⁰Ku a katuk tuita changle, ilaxle ku tsom-saxbu a ija zanhunui changle. Ku mongkün asheme awan ngole kue chix ma mongzom müikya hia mongsom kopkya a.

¹¹Solomon ang grep haxtok tüile Bal Hamon le nyakkya onui ma. Chix tokhange akatkya manzai mixbu tüile, pangnusae wüi khop-jan ngunkhix ojat pong tüile.

¹²Solomon a chix tsyen hajat ngunkhix lax ang pongle kop, ilaxle manzaimixbu ang hwom tsyen ho-anyi pong kox; Ku ang ku grep haxtok tuita tüile!

¹³Tsawat mong tokhange kue nang kaxzing atat ang tomhüi, ku mongkün; ku zuikhuibue nang kaxzing apa ang tanle ngole.

¹⁴Ku hato oman, ku mongkün, khisa-zongmüi ningle, otex-tsyapibu nyemle tüikya haxnubu to khipongsa tuita ningle.