Read Wancho Naga Isaia 1 Bible Online

Isaia 1 - Wancho Naga bible

Isaia 1

¹Ija laipex ma Judah hia Jerusalem hato fakya kaxho tüile. Ija kaxho a Amoz sasün Isaia hato, Uzziah, Jotham, Ahaz hia Hezekiah, Judah nok wanghombu hato Zang-e ngaile ahokya kaxhobu changle.

²JOWANPAe akax: “Ding-hi-hax, kue chem akaxpuix ija to apalax! Kue tux-tsomle atsünkya naosombue ku zan to kale.

³Maihubue hwom hopunubu awanle, ilaxle mantsakbue hwom hopunubue fumtsüt ang ojongto paopuix ija awanle. Ija a ku khünaknu Israel noke ku tsingkya thak changle. Ibue ojaojao müntsing.”

⁴Ochax jat-li tamchu laxli chitüikya hia chichang-chizangkyabu, hünzom a müt-shua! Hünzom ochaxe hünzom bele jole! Hünzome hünzome JOWANPA, Israel nok otsao Zang pongle chikop ilaxle chix hato hünzome tok ahole changdaoa.

⁵Hünzome büthüikoxle alünle ajonglanle ngopu? Hünzome anaolechu sikngün süchongkya lompia? Israel, hünzom khang a thomzün-maklaxkya füi chwople tüidaoa, ilaxle hünzom kün-mong hia khangka a kakle tüile.

⁶Khang makhange cha kople hünzom ma tsangtsa fanmüile tüikya manwan chemchu mün-ngün. Hünzom a zutle akhixkya hia mak-chak tamchu thomzün makbu otok to ngünle tüikyabu füi awangle tüile. Hünzom mak-chak a sole tamchu lople chithom. Ibu to hinghai cheme chu chizu.

⁷Hünzom haxtok a komkaile amadaoa ilaxle hünzom tingnubu a zokle ashunle hax to adütdaoa. Hünzome hule ngongale, zannokbue hünzom haxtok lax üntoxle pangnu olithu ang tom.

⁸Grep haxtok nyetmix pomsa hia wum-wao mwonsa angkya tap tuita ningle, Jerusalem tingnu chix tata, mix chak to kople thomdaokya tingnu, ojao ziakopmix chitüi homtoxle danle tox.

⁹JOWANPA Khüthak Zang-e züizüi ozün ma chitox thüikoxle, Jerusalem a Sodom hia Gomorah tingnubu ningle komkaile amadaose.

¹⁰Jerusalem, nang apünkyabu hia nang khünaknu a Sodom hia Gomorah nok ningle. JOWANPAe hünzom füi chemle akaxpuix ito apalax. Kem Zang-e chem anwot-anopuix, ito mongkoxlax.

¹¹Chixe thüi: “Hünzome ku ang koxle hüikya töbu kue lomle le hünzome ajangpuix nyi? Hünzome ku ang tö koxle zokle ashun ngokya chunbu hia müizaobu füi süluile ku ma tüipu. Ku a maihupong, chun hia zwon ibu aji füi aole shuüna.

¹²Ku to shwom ang nguipongma ibu ku hato apüi angkya changle le owae thüi? Ku Zangshwom-Hom ma hünzom ang chilaxle mwot ibu moklaxle owae thüi?

¹³Hünzome töbu apüile kox ngo angkya mwot jao münchang. Hünzome zokle ashun ngokya ongane ku to male jao mutüna. Hünzom lyetzün pangpwon, Sabath hia hünzom zanglom tusox to ngo ang jao müntho; ibu pangwüi hünzom ochax makhange amale awütdaoa.

¹⁴Hünzom lyetzün pangpwon hia atsaole nuikya nyixbu thua ku anule maxle; ibu a ku zongto hünlit ang changle. Ibu pai-nwon angkya ku na-juale maxle.

¹⁵“Chemtue hünzome zangjop ang hünzom chak nwonle changpuix, kue hünzom to ojao münhu. Hünzome obukux wüi jopkoxlax, kue münapa chemthüikoxle hünzom chakbu a ajie awangle tüile.

¹⁶Hünzom sole atsaolax. Hünzome kue ngünle mokngokya ochax mwot mokkyabu zakün. Changle, ochax mokkya zakün,

¹⁷ilaxle sukya mwot mok ang awanle koplax. Kaxfün sule facha: afangle thomkya to fongcha hex, zasa-khaxsabu ang süntswon facha hex, zomnubu kho awale kopcha hexle hukoplax.”

¹⁸JOWANPAe thüi: “Athaxpi zangwün tsuakle kop-hax. Nang a ochax füi lyetle akhik thomle, ikoxlechu kue nang paiput ningle sole atsyetüi.

¹⁹Hünzome ku kax ma laxle jangchang, hünzome ma haxtok ma alaikya müikya oli sax-laxle ngoüi.

²⁰Ikoxlechu hünzome ku mün amale jangchang, hünzom a zikmüt-mangkho thama ma tüile. Ija a, JOWANPA, kue akaxdaoa.”

²¹Amipongma kax ma laxle tüikya tingnu zanglom-saikha a ma-tsa hangkya mixcha tuita ningle! Hanpak tuita ma ija a otsao khünakbue awangle tüikya, ikoxlechu athax a mix lang mixe awangle tüile.

²²Jerusalem, amipongma nang a khop-jan ningle tüikya, ikoxlechu athax nang a chilaxli ma tüile.

²³Nang lompabu a alünle ajongkyabu tamchu ahuxmixbu zuikhui ang changdaoa, hwome othuithuima hingho-chaktwon hia zuizunbu pongle kople. Hwome otuechu khwa ma zasa-khaxsabu kho münse chichangba zomnubue apüikya zangwün to nathale münchang.

²⁴Ikhoma athax, JOWANPA Khüthak Zang, Israel nok Zang-e ile akaxle ngokya to apalax: “Kue nang to olüix khomüi, hünzom ku zanpabu, ilaxle hünzome ku ting münatüiüi.

²⁵Kue nang to chak mokle changüi. Tu achukle atsaokya lailaile kue hünzom atsaoüi, ilaxle kue hünzom chitsaokya pangwüi awütle faüi.

²⁶Kaitanto tüikya ningle kue hünzom ang pünpa-chongwangbu hia nguakax-wangkhobu koxüi. Ifüima Jerusalem ang ‘otsao hia mongong tüikya tingnu’, le nyaküi.”

²⁷JOWANPA otsao changkya khoma, chixe Jerusalem tamchu ima tüikya opang ang künlop-monglüile chang ang tompuix, hwom khosünüi.

²⁸Ikoxlechu chix füi alün-aloxle hia ochax lyenle changkyabu pangwüi chixe zutle akhixüi; ilaxle chix pongle chikople tüikyabu pangwüi chixe mik-amütüi.

²⁹Pünzuabu hia küi-thwomle alaikya küili-wüili otsao tsawatbu mong ma tüikyabu to shwom-tole hüikya khoma nang ang mongmakya tüiüi.

³⁰Nang a, owaechu ti chikoxkya tsawat kha angkya tuita zak pünnu ningle zile paoüi.

³¹Wünpua pikyae tsaxsa ma wün apütle zokle ashunkya ningle, tüle zax-zangle tüikya khünakbu, alüile ma ochax khokho ma max angkya thama apongüi; ija thama owaechu tsyenle tui ang chithoüi