Read Wancho Naga Isaia 10 Bible Online

Isaia 10 - Wancho Naga bible

Isaia 10

¹Hünzom a maxdaoa! Hünzome ku khünakbu to zothup angkya hanpakma chisukya wanlombu zingle alai.

²Ilele wüi hünzome mixshix-zasabu ang hwom süntom hia sukya kaxfün kop ang chitomle tsyen thom. Ilele wüi hünzome zomnu hia khaxsa hwom angkya tuinabu tswonle lax.

³Zang-e hünzom to zothuple changkya zuma hünzome chem moklaxüi? Chixe tsailo nok tokhange hünzom hato thama apüi ang tomkya zuma hünzome chem moklaxüi? Hünzom to asun angkya lomle hünzom ojong to paolaxüi? Hünzom tuinabu hünzome ojongto khomle thomlaxüi?

⁴Hünzom a zanhok ma lang ang tomüi chichangba zandabu ang linle pao ang tomüi. Ile changkox-ngaxchu JOWANPA mongtsik a münbaktox; sikngün fa angkya hanpakma chix chak a ajong lüwüi ngoüi.

⁵JOWANPAe thüi: “Asiria! Kue Asiria a ku mongtsikle tüikyabu to sikngün fa angkya hanpakma tuita kiathox ang twonpu.

⁶Zang chilax homtoxle ngokya jat-li to sing angkya hanpakma kue Asiria nok apaopu, ku mongtsik ang tomkya khünakbu to a. Kue hwom tuinabu tsui angkya tamchu ahux angkya ilaxlechu khünaknu to tingjang tokya haxbu to nakpupule nakle tox angkya hanpakma kue hwom apaopu.”

⁷Ikoxle Asiria nok chongwangpa mong machu jannong alüi angkya mongzang wünkya tüikya dai ang. Chixe obiobi jat-libu ama angkya mongzang wünlaxle tüile.

⁸Chix ang mongngam: “Ku süpahi lompabu pangwüi wanghomhom wüi changle!

⁹Kue Kalno hia Karkemish tingnubu tingtakle kop, Hamath hia Arpad tingnubu a. Kue Samaria hia Damaska tingtak.

¹⁰Ku a Jerusalem hia Samaria ma tüikya chapabu füi ngaxchu süluile, chapabu to shwomle ngokya wangtingbu to sikangün angkya hanpakma kue ku chak ajong.

¹¹Kue Samaria hia ima tüikya chapabu pangwüi amadaoa, ilailaile Jerusalem hia ima shwomle tüikya chapabu to kue hwonüi.”

¹²Ikoxlechu Jowanpa-e thüile: “Chemtue kue Zaion Haxnu hia Jerusalem ma mokle ngokya ku mwot ashukle hüiüihex, chix angam azole tüikya khoma Asiria nok chongwangpa to sikangünüi.”

¹³Asiria nok chongwangpa mong ngam üntoxle thüi: “Ibu pangwüi kue mokle tsuakpu. Ku a tsak-zongle, jetüi hwonlangle tamchu tsingtsange awangle tüipu. Jat-libu ba ma tüikya longzibu kue amütpu ilaxle hwome athünle thomkya tuinabu komle paopu. Maihupong füi nakkya lailaile ikhato ngole tüikya khünak pangnusa to kue cha füi nakpu.

¹⁴Chaxwannu angkya jat-libu a o-zopbu ningle chang, ilaxle ibu angkya o-tibu tswonle laxpupule kue ochwonpai ma hwom tuinabu tswonle lax. Ku aza angkya hanpakma ozang tuita chiajep; ku azale daple dongkya kha chitüi!”

¹⁵Ikoxlechu JOWANPAe akax: “Twonkya mix füi ma wüi achongkya changpule wa-e akax ang tho ang chami? Ija twonkya khünak füi janzütbit wüi achongkya changchami? Kiathox-e khünak nwonkya münchang ikoxle khünake mix kiathox nwonpu.”

¹⁶JOWANPA Khüthak Zang-e, athaxpongma wokfwot tilan müile ngokyabu to sikangün angkya hanpakma okak-olak ahüi angkya changle. Hwom tsangtsa ma chizakle zokle ashun ngokya wün tüingo angkya changle.

¹⁷Zang, owa Israel nok zangngai changpuix, chix a wün ang achangle paoüi. Israel nok otsao Zang a wünle ang changüi; ijae nyixtakya bama wüi pangwüi zokle ashundaoüi, kongbüi hia hux pünbu ngaxchu wüi zokle ashunüi.

¹⁸Shonak-lingnu hia manzai haxtok komkaile amaüi, ija lailaile ija chisumüikya okake khünak tuita max ang tomüi.

¹⁹Naosombue to lünle akiak ang thole pünbu a hidaole wüi dantoxüi.

²⁰Ozün ma danle toxkya Israel khünakbue, hwom amüt-asam ang tungkya jat-libu to mongong chithomtsuak angkya hanpak tuita nguile ngole. Hwome hwom mongong komkaile JOWANPA, Israel nok Zang to thomüi.

²¹Israel khünakbu hidaole wüi hwom chitho-jalün Zang hato chatüi.

²²Athaxpongma Israel khünaknu a tinu khatokya fix büta tüile ngokoxchu, hwomkha angkya hidaole wüi chatüi. Khünakbu hanpakma thama a athünle thomle, ilaxle ija kop angkya asupu.

²³Changle, chixe amüt angkya hex-ole akax daokya ningle, chaxwantok pangnu hato wüi JOWANPA Khüthak Zang-e thama apüi angkya changle.

²⁴Zaion ma ngole tüikya chix khünaknu ang JOWANPA Khüthak Zang-e thüile: “Ijip nok lailaile hwome hünzom to zothuple tüikoxchu hünzom a Asiria nok thua taxza.

²⁵Kue noxtakya bama wüi hünzom to sikangünkya tsuakdaoüi, ifüima kue hwom amütüi.

²⁶Oreb Longnu ma kue Midi nok to fitpupule, JOWANPA Khüthak Zang, ku jaoe ku müikhwon zu füi hwom to fitdao angkya changle. Asiria nok hia Ijip nok to kue sikangün angkya changle.

²⁷Chemtue ija hanpak nguile hüiüihex, kue Asiria nok chak tokya khangkho zangngai ang tomüi, ilaxle hwom dang a hünzom suakto ma hünlix tuita ang münngopu.”

²⁸Zan-nok süpahibue Ai tingnu bakle hwop kopdaoa! Hwom a Migron akaile le! Hwome hwom tuinabu Mikmash ma tox!

²⁹Hwome ija lomtang akaile le ilaxle Geba ma wünpom! Ramah ma tüikya khünaknu abüt, ilaxle wanghompa Sol tingnu ma tüikya khünakbu zikle pao.

³⁰Akhongkox, Gallim angkya khünakbu! Apakoplax, Laishah angkya khünakbu! Lanlax, Anathoth angkya khünaknu!

³¹Madmenah hia Gebim angkya khünakbua hwom khang azang ang pao.

³²Anyixkha zanpabu a Nob tinglong ma tüile, ilaxle ikhato Jerusalem tingnu angkya Zaion Haxnu ma hwome chaktombu sile aloxle.

³³JOWANPA Khüthak Zang-e hwom a taole pünkangbu adütpupule adütüi. Mongngam füi hia tsuale tüikyabu a dakle anguaküi ilaxle thajao kop ang tomüi.

³⁴JOWANPAe hwom a ling sungkha angkya pünbu wa füi dakle anguak pupule dakle anguak angkya changle, ilaxle Lebanon angkya ataxle müikya pünbu nguakle paokya ningle nguakle paoüi!