Read Wancho Naga Isaia 11 Bible Online

Isaia 11 - Wancho Naga bible

Isaia 11

¹Dawid füikya wangli a dakle anguak daokya pün tuita ningle; ikoxlechu pün otongtho tuita makhange tamchatle pünsong chuile laikya ningle, Dawid su-sa hwom makhange wanghom hozün tuita laiüi.

²JOWANPA Chasa makhange chix ang hwon-je koxüi, chix khünaknu to apün angkya hanpakma chix a awan-atsingkya koxüi. Chixe JOWANPA mongtex awanle laxüi ilaxle chix achuak-achenle changüi,

³ilaxle chix kax ma laxle changkya ma mongzom müikya tüiüi. Chixe ngünkya hia atatkya ma laxle kaxfün münfa;

⁴chixe mixshix-zasabu bama sukya kaxfün faüi ilaxle asunfa angkya mix chitüikyabu süntom amüt ang müntomüi. Chix kaxtom ma khünaknu to sikangünkya tüiüi, ilaxle ochax khünakbua ziüi.

⁵Chixe chix khünaknu to sukya kaxfün fakya hia müikya mün tüikya füi apünüi.

⁶Shwon hia chunbu a tumüi ma ngole hüiüi, ilaxle mailangbu a zwonsabu füi abule jipngoüi. Maihusa hia mailang hosabu a tomwüi tuxüi , ilaxle ibu to naosombue nyele ngoüi.

⁷Maihu hia chepbue tomwüi saxlaxle changüi, ilaxle maihusa hia chepsabu tumüi ma abule jiple ngoüi. Mailangbue maihu lailaile tsaxsa saxüi.

⁸Naosa tuita to ngaxchu zia-amakya chitüiüi oje füikya pubu zui ma hwom abaole ngokoxchu.

⁹Zaion, Zang otsao Haxnukho ma, thama adün angkya oli hia ochax chemchu müntüiüi. JOWANPA tsing-wankya füi chaxwan awangle changüi tinu shinthuk ti füi awangle tüikya ningle.

¹⁰Jat-libu hato mowan tuita ang Dawid sixli kha angkya wanghom hozün tuita ngai angkya hanpak hüile ngole. Chix chongwang tingnu ma hwom nguiüi ilaxle chix achuak-achenle changüi.

¹¹Chemtue ija nyix nguile hüiüihex, Jowanpa-e chix tsak-zong tamchatle twonüi ilaxle chix khünaknu opang Asiria nok hia Ijip nok, Pathros, Etheopia Elam, Babilon, tamchu Hamath ibu haxtok to tüikyabu, ilaxle tinu kax achole tüikya hia shuazo to ngole tüikyabu, ibu pangwüi ma chaxwan lomle chat ang tomüi.

¹²JOWANPAe, chiakle tüikya chix khünaknu Israel hia Judah nokbu chaxwannu ozong ali pangnu chitokya tamchatle asox atomle chang ang tomkya mowan ahole nyiluak apiküi.

¹³Athaxpi Israel nok wangtinge Judah wangting to tsak-khukya müntüiüi, ilaxle Judah nok a Israel nok zanpa ang achangle münngoüi.

¹⁴Okhi athütlaxle hannop chikao ma Filistia nok to singüi ilaxle handün chikao ma ngokya khünakbu tingtakle amütüi. Hwome Edom hia Moab nok hwom chak to hwople kopüi, ilaxle Amon noke hwom kax ma laxle tüiüi.

¹⁵JOWANPAe Suiz angkya tinu shinthuk angkya ti azopüi, ilaxle chixe Eufrat shuanu azop angkya hanpakma khamtungkya zangwin apüiüi, ikoxle muaküsa shuasa anüt wüi zop ang chitomle dantoxüi, chemthüikoxle ibu a pangnusae wüi ahamle ti ta ang tsuakle tüikoxle.

¹⁶Ikhato chizi-chimaxle tüikya chix khünaknu hanpakma Asiria akaile tit-thui lomnu tuita zingüi; ija a, hwom pupa hwom Ijip nok tokya laile pao tanto tüile ngokya ningle changüi.