Read Wancho Naga Isaia 15 Bible Online

Isaia 15 - Wancho Naga bible

Isaia 15

¹Ija a Moab ba angkya kaxho changpu. Ar hia Kir tingnubu a jatakya fang ma wüi amütle, ilaxle Moab haxtok chaxwan adangle awüt.

²Dibon angkya khünaknu baozang to shwomnui zui ang haxkho to dong. Moab angkya khünaknu a Nebo hia Medeba tingnu nyi mangsop; mongma laxle hwome khangmun hia tunmunbu ongle awüt.

³Tingjang-lomnu tokya khünaknue nyikhwon awun; tingnu haxsha hia homkhobu to khünaknu mongmaxle mangsop.

⁴Heshbon hia Elialeh angkya khünaknu sople akhong, ilaxle hwom sopkya ozing a Jahaz tokhange jao atat ang kop. Süpahibu ngaxchu wüi zale abün; hwom ang mongchen ojao chitoxle sam.

⁵Moab hanpakma ku ang mongkha tokhange sopdong! Khünaknu a Zoar tinglong hia Eglath Shelishijah tinglongbu to paole azang. Züizüi a Luhith lomnu to dong, lomba to hwom sopngale aham; züizüi a akhongle sople Horonaim to paole azang.

⁶Nimrim shuasa ma ti chitüi, ija shuakax angkya fum pangwüi zile zan, ikhato hingkya oli tuita chitox.

⁷Khünaknu a Pünnubu nyemle tüikya Haxsha akaile le, hwom a ma tuinabu füi paole azang ang azong.

⁸Moab longzipong pangkha towüi sopkya ozing atat ang kop. Eglaim hia Berelim tinglongbu tokhange ngaxchu wüi atat ang kop.

⁹Dibon tinglong ma shuajen bakle aji füi khile tüikya ilaxle ikhato tüikya khünakbu hanpakma Zang-e ito kaikya thama athünle thom. Changle, Moab ma ota toxkya pangwüi aji akhikle langle awütkya tüiüi.