Read Wancho Naga Isaia 17 Bible Online

Isaia 17 - Wancho Naga bible

Isaia 17

¹JOWANPAe thüi: “Athax Damaska a tuita tingnu le münngoüi; ija a tingmaxdaokya tamting tuita ang ngoüi.

²Siria tingnu a othuithui hanpak ang awütle toxüi. Ibu a chun hia maihubu hanpakma fumtsütnui ang ngoüi, owaechu hwom jwonle münapao.

³Israel a ziakopkya chitüile changüi, ilaxle Damaska-e ma pongwün amütüi. Siria nok opang ozün ma toxlaxpuix, ibu a Israel nokbu ningle jatle awütkyabu ang achangüi. JOWANPA Khüthak Zang, kue akaxdaoa.”

⁴JOWANPAe thüi: “Israel chuak-chongle ngokya ashuk angkya din hüile ngole, ilaxle hwom tuinabu tüile ngokya a otui-onuak füi alüixüi.

⁵Israel a sozam pakle puamün wün füima dantoxkya haxtok ningle, ikha angkya tsaxthop khünake tsui wün füima awütle toxkya Refaim haxsha ningle.

⁶Khünak hidaole wüi ozün ma toxüi, ilaxle Israel a, okho to tomta hia anyi toxlaxle chichangba kangtong to tomta anyi toxlaxle oziak bakle khaile laxdaokya olip pün tuita ningle changüi. JOWANPA, Israel nok Zang kue akaxdaoa.”

⁷Chemtue ija hanpak nguile hüiüihex, Khünaknu a hwom zingpupa otsao Israel nok Zang hato asun hüile chatüi.

⁸Athaxpi hwome ma chak füi zingle alaikya tö-tsapbu to mongongkya müntüiüi, chichangba hwom chakzing mwot: baozangchanu Asherah mua hia ongan müikya so füi zokle ashunle tö koxkya tö-tsap, ibu to mongongkya müntüiüi.

⁹Chemtue ija nyix nguile hüipuix, müile ziakople thomkya tingnubu khünak chingole awüt-toxüi ilaxle ibu a Hip nok hia Amor nokbue Israel nok zantho to paoüima hwom tingnubu danle awüt toxkya ningle changüi.

¹⁰Israel, longnu tuita lailaile nang to tukle khosünle tamchu wintuk-hanthale ngokya Zang nange alakle asamdaoa. Itülüi, nange mixnok baozangbu to shwom angkya hanpakmale otsao tsawatbu azün .

¹¹Nange küi-thwomle toxkya nop wüi ibu asoklaxle puale changkoxchu, ibu ma puamün angkya chemchu müntüiüi. Sikngün thangdang hia chimüitsuak angkya okak tata wüi changüi.

¹²Tinu akhongkya ozing ningle, tichap chongkya thule hüikya ningle ozing atatkya thoto tsak-zongle tüikya jat-libu alik-alox ang tomle.

¹³Jat-libu a tuita tichap ningle thuthusyeple hüile, ikoxlechu Zang-e hwom to sa ilaxle anongle achat, haxkho tokya haxkhix-labu ningle hwom jwonle apao, zangchei to tsaxsa pipupule hwom pikle pao.

¹⁴Hansong ma hwome tingtui huanu adün, ikoxle ngainopkya thoma hwom chibang. Kwom haxtok tha-amakyabu pangnusa füi apong angkya osho a ija changle.