Read Wancho Naga Isaia 19 Bible Online

Isaia 19 - Wancho Naga bible

Isaia 19

¹Ija a Ijip nok ba angkya kaxho changle. Hulax, JOWANPA a akhangle zikkya zangfwom khoma ngalaxle Ijip nok to nguingole. Chix tunthoma Ijip nok chapabu hia Ijip khünakbu mong münchong tsuak.

²JOWANPAe thüile: “Kue Ijip nok ma nokpu zan lai ang tomüi ilaxle tüita-naopa hia tomzi-longzi bama tata zan to kale chang ang tomüi. Tingnu hia tingnubu, wanghom hia wanghombu tsak-zong ma atinle tata füi achax-azan ang tomüi.

³Kue Ijip nok katzua atho ang tomüi ilaxle hwom tutex amale awütüi. Hwome hwom to asun angkya hanpakma hwom chapabu füi hwom to asun angkya kax akaxüi, ilaxle hwom ang mongkho adün fa angkya hanpakma aje-ahing hia lwompu hwom chasabu ma tsaitik-kaxshole changüi.

⁴Kue Ijip nok a ojao chingcha chitüile hwom thak ma apün-ada angkya wanghom tuita chak to owüiole koxüi. Ija a, ku, JOWANPA Khüthak Zang-e akaxdaoa.”

⁵Nail shuanu ma ti hixle hüiüi, ilaxle oshukma ti owüiole zople zanüi.

⁶Shuajenbu a zaze-zazele zople paokya füi tomle onom-osya ang changüi. Acha hia ze huile paoüi,

⁷ilaxle Nail shuanu kax achole saikya saxbu zile zanüi ilaxle jeple paoüi.

⁸Nail shuanu ma nyaxkop laxle kako woktuxle ngokyabu awaoüi ilaxle akhongüi; hwom jankuix hia shabu a chem angchu chichangüi.

⁹Jaknyi takle alai ngokyabu ang khosamüi;

¹⁰nyitak mixbu hia zingpa mwot awanle mokkyabu ang mong ashixle mongmaxüi.

¹¹Zoün tingnu angkya lompabu a ongat changpu! Ijip nok hwontüi-jelangkyabue ongat hwon-anole koxle! Hwom a kaipongkya manpa-tsingpabu hia wanghombu lüi angkyabu changpule hwome wanghompa hama chemle wüntsuak?

¹²Ijip nok wanghom, ibu hwontüi-jelangle tüikya nang lompabu omaxün? Owatsing hwome nang hama Ijip nok hanpakma JOWANPA mongtex apuale fa ang tsuak.

¹³Zoün hia Memfi angkya lompabu a ongatbu changle. Hwome jat-li lom azuisepa ikoxle hwome ija othai lom to mix azuile.

¹⁴JOWANPAe othai lom apuale fa angkya hwom ang kho asamle kox. Ija khokho ma, Ijip noke pangwüi othaithai mok ilaxle jutok mix chix fat ding ma alüile jiple ngokya ningle mixshixle ngün ang tom.

¹⁵Ijip nok ma owachu, hakpa wüi changlax nuakmix wüi changlax, akhokya mix wüi changlax chilaxli khünak wüi changlax, opupuechu fongtsoxle chang ang müntho.

¹⁶Ijip nok a tuita mixnu-sheko ningle zakwot ang achang angkya hanpak nguile hüile. JOWANPA Khüthak Zang-e hwom to sikangün ang chak ahale ngünkya zuma hwom a tüle abüt-abanle zakyae tsangtsa sile anyonüi.

¹⁷JOWANPA Khüthak Zang-e hwom hato ahüi angkya thama texle atak pupu ma Ijip khünakbu a Judah nok thua zale changüi.

¹⁸Chemtue ija hanpak nguile hüiüihex, Ibri zangwün a Ijip nok angkya tingnu aga ma wünüi. Ikhato ngole tüikya khünakbue JOWANPA Khüthak Zang mün ma tsaotsütle changüi. Hwom kha angkya tingnu tuita ang: “Zanghan Tingnu”, le nyaküi.

¹⁹Chemtue ija hanpak nguile hüiüi hex, Ijip nok chaxwan ma JOWANPA hanpak ang tö-tsap tamchu longzipong ma chix mün ma atsaole thomkya küilonglo le tüile ngoüi.

²⁰Ibu a Ijip nok haxtok ma JOWANPA womle tüikya mowan ang changüi. Chemtue ikhama ngokya khünaknu to zothuple afang thompuix ilaxle hwome asunhüile JOWANPA to akhongle nyak pongma, hwom khosünle kop angkya hanpakma chixe owawa ahüiüi.

²¹JOWANPA chix jaoe chix a Ijip hato ngaile ahoüi, ilaxle hwome chix changkox-ale ngailaxle chemtue chix to shwomle changüihex, ipongma hwome chix hato töbu apüile koxüi. Hwome chix tunthoma tsaotsütle changüi ilaxle hwom chem tsaodaopuix ija otsingtsing ma moküi.

²²JOWANPAe Ijip nok to sikangünüi, ikoxlechu chixe fitkya makbu chixe wüi amüile koxüi. Hwome a chix hato mongchatle hüiüi, ilaxle chixe hwom zangjop atatüi ilaxle hwom kak amüile koxüi.

²³Chemtue ija hanpak nguile hüiüihex, Ijip nok hia Asiria nok nyi bama tuita küitho lomnu tüiüi. Ija nok anyi angkya khünaknu ija lomnu ma püi-lüile ahamüi, ilaxle ija noknu anyie tomle zangshwomle changüi.

²⁴Chemtue ija hanpak nguile hüiüihex, Israel nok a Ijip nok hia Asiria nok füi tsempa ang achangüi, ilaxle ija nok azom a zangfang hanpak ang mohiman ang changüi.

²⁵JOWANPA Khüthak Zang-e hwom to mohimanüi ilaxle thüiüi: “Kue hünzom to mohimanüi, Ijip nok, hünzom ku khünakbu; nang, Asiria, owa kue zingle alaipuix; ilaxle nang, Israel, kue zünle kopkya khünaknu.”