Read Wancho Naga Isaia 2 Bible Online

Isaia 2 - Wancho Naga bible

Isaia 2

¹Ija a, Judah hia Jerusalem nyi bama, Amoz sasün Isaia ang Zang-e fakya kaxho changle:

²Athax füichi ma Zangshwom-Hom ajongle tüikya haxhua haxhua pangnusa füi süchuakle tüiüi, haxhuabu pangnusa to ijae tuküi. Abünle zakya füi jat-libu ija haxhua hato nguiüi,

³ilaxle ikhato khünakbue thüiüi, “JOWANPA haxhua to kem donghax, Israel nok Zang Zangshwom-Hom to a. Chixe chem naxmokle texpuix ija chixe kem hama apuale faüi; kem a chixe zünle kopkya lomtang ma ahamüi. Chemthüikoxle JOWANPA hwon-nwot a Jerusalem tokhange hüile; Zaion makhange chixe ma khünaknu füi zangwünle.”

⁴Chixe chongkya jat-libu ba angkya ala-ashakya zangwün tsuakle faüi. Hwome hwom changbu han-kho ang achangle thupüi ilaxle paxbu a fumham changlosabu ang thuple alaiüi. Jat-libu tamchatle tata zan to münkaüi, tamchatle achax-azan ang atha-nyemle münchangüi.

⁵Athaxpi, Jakop sixlibu, JOWANPAe kem ang fakya zangngai ma ahamhax!

⁶O Zang, nange nang khünaknu awütdaoa, Jakop sixli hwom a! Ija haxtok a handünchi hia Filistia nok tokhange ahüikya chajik-muashem mwote awangle tüile. Khünakbue mixnok zanglom-saikhabu twonle.

⁷Hwom haxtok a hun hia khopbue awangle tüile, ilaxle hwom tuina ma oshuk-oza müntüi. Hwom haxtok a manbue awangle tüile ilaxle hwom man-kanlinbu ma oshuk-oza müntüi.

⁸Hwom haxtok a chapabue awangle tüile, ilaxle hwom chakbu füi zingle alaikya mwot-katbu to hwome shwomle.

⁹Pangnusae hwom tha ajaole adix-adaüi. JOWANPA, hwom ang thailakkya taxtüi!

¹⁰Hwom a longtsyentua tokya longkunbu nuk to khünüi chichangba JOWANPA mongtsik hia chix tsak-zong tamchu chix fuazang chak tokya sün angkya hanpakma hwom haxkha thole azang ang azongüi!

¹¹Khünaknu mongngam ashukdao angkya tamchu khünaknu mongngam maxdao angkya hanpak nyixta hüile ngole. Ipongma JOWANPA chix tata tix achuakachenle changüi.

¹²Opang zaxzangle tüipuix, opang mongngamle tamchu tsaichong-kaxbongle changpuix, ibu pangwüi, ija nyix a JOWANPAe adang daoüi.

¹³Chixe Lebanon angkya tüle tsuale tüikya sedar pünbu hia Bashan angkya zak-pünnubu amaüi.

¹⁴Chixe tsuale tüikya haxnu hia haxhuabu ajitle zingüi,

¹⁵tüle tsuale tüikya long katuk, ilaxle zanhu nui katukbu pangwüi ajitle zingüi.

¹⁶Chixe akhole chongkya hia osün müikya khuabu ti to sing ang tomüi.

¹⁷Khünaknu mongngam ashuküi, ilaxle khünaknu mongngam amadaoüi. Chapabu a komkaile maxüi, ilaxle ija nyix a JOWANPA, chix tata tix achuak-achenüi.

¹⁹Chaxwannu to sile alox ang chix nguipongma, khünaknu a longtsyentua tokya longkunbu nuk to azwonnui tamchu JOWANPA tsak-zong hia chix fuazang thoto, haxwan tholaxle, ikhato paole azang ang azongüi.

²⁰Chemtue ija nyix nguile hüiüihex, hwome khop hia hunbu füi, mae alüile zingle thomkya chapabu tswonle awütüi, ilaxle ibu a thufa hia opak-pakpebu ang danle toxüi.

²¹Chemtue JOWANPA chaxwannu to sile alox ang nguiüihex, khünakbu a longtsyentua tokya longkunbu nuk to khünüi ilaxle hax tho üntoxle JOWANPA tsak-zong hia chix fuazang tuntho angkya paole azang ang azongüi.

²²Ziün angkya khünak to mongong taxthom. Ibue chem thathap angkya tüi?